Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Wanneer dat cloester tot Oestbroeck worde ghesticht, ende hoe die broeders van der Premonstreyten Oerde tot Middelburch quamen.
Dat VII capittel.

In den jare Ons Heeren M C ende XXI heeft bisscop Godebaldt uut rechter devocien ende tot sijnre ewiger memorien doen fonderen ende stichten een cloester in een lant, daert eenlicken was van monicken ende van nonnen, elck op hem selven, in die ere der Heyliger Maget Maria ende des heyligen martelaers Sinte Laurens, ende dat hiet Oestbroeck. Ende in ditselfde cloester dair leefde men menich jaer so strengelicken ende so volcomelicken na Sinte Benedictus regel, dat men dit cloester menich jaer hiete der Oerden Kercker. Ende daer plach grote versaminge te wesen, want daer bloeyde alre strengelixste die regel van Sinte Benedictus Oerde.

Dese biscop Godebalt heeft die canonicken reguliers¹⁵², om hoer quaet levens ende regiments willen, verdreven ende verjaecht uut dat convent van Middelburch, ende dede daer weder incomen broeders van der Oerden der Premonstreyten uut Sinte Michielscloester van Antwerpen.

152 regulies AB.