Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hier beghint die IX divisie ende heeft IX capittelen.

Anno XLIX.
Paeusen.
Dat I capittel.

Leo die IX was die C LXI paeus, een Duytsch, ende sat V jaer ende II maenden. Als dye paeus Damasus gestorven was, senden die Romeynen haer ambassiaten totten keiser, omdat hi hem enen paeus setten soude; want si hem des niet onderwinden en dorsten, omdat sijt den keiser also geloeft ende gesworen hadden. Doe vergaerde die keiser vele biscoppen in der stat van Ments om raet mit hem te nemen, wie hi best tot enen paeus setten soude; mer nyement van den Duytschen bisscoppen en woude dat annemen om dat quader gewoenten willen der Romeinen. Ende si ordineerden enen devoten geleerden man geheten Bruno, biscop van Tolleten, ende die sende hi te Romen als een paeus; ende als hi te Romen quam, worde hi onderwesen dat hi van consciencien wegen dat paeusdom also niet besitten en mochte, want die keiser geen macht en hadde enen paeus te setten; ende was bereit dat willichlicken over te geven, want hi een Godvruchtich man was. Ende om sijn heilich levens willen coren hem doe die cardinalen eendrachtelicken tot enen paeus, ende en wouden anders genen hebben. Ende wert genoemt Leo die IX. Hi was seer milt tegen den armen, ende dede vele caritaten.

Victor dye II was dye C LXII paeus, een Duytsch, ende sat II jaer ende III maenden. Hi wert meer gecoren uut vresen des keisers, die die Romeinen seer ontsagen, dan uut vriheden. Hi hadde een concilium te Florens, daer hi veel biscoppen priveerde ende ofsette omdat si mit simonie gepromoveert waren of mit onsuverheit des levens besmettet, ende heeft die clercken een peyn ingeset die den canones

[p. 122v]

ende geestelicke statuten niet en onderhilden. Ende daer, tot Florens wesende, starf hi, ende wert aldaer begraven.

Stephanus die IX was die C LXIII paeus. Hi was uut Lottringen, een Duytsch, ende sat omtrent IX maenden. Hi brochte die kerc van Meylanen weder tot obediencie des stoels van Romen, die daerof omtrent II jaren verdwaelt hadde geweest; mer blijft nu gestadich tot noch toe. Hi hadde een concilium ingheset tot Florens, mer hi starf, ende wert aldaer in die grote kercke begraven.

Benedictus die X was die C LXIIII paeus, een Campaem, ende sat omtrent IX maenden. Hi wert mit gewelt paeus gemaect. Ende als die cardinalen ende andere biscoppen mercten dat si te Romen ghenen paeus mit vreden kiesen mochten, togen si ter Seyn, ende koren enen anderen, die waerdich was sulken digniteit te besitten. Ende dese Benedictus wert also informeert, dat hi dat paeusdom lyet, ende toech weder in sijn biscoplicke stoel vandaen hi gecomen was.

Nicolaus die II was die C LXV paeus. Hi was uut Savoyen ende sat III jaer ende VI maenden, XXVI dagen. Hi worde eendrachtelicken van den cardinalen paeus gecoren, ende quam te Romen, ende hilt daer een concilium tot Sint Jans te Latranen. In denwelcke hi insette een forme, hoe dat dye cardinalen enen paeus kiesen souden. Hi croende mit groter feest keyser Henric die IIII, ende als hi vele goede statuten ingeset hadde, starf hi, ende wert tSinte Pieters begraven¹²⁴.

Alexander die II was die C LXVI paeus van Meylanen, ende sat XI jaer ende VI maenden. Om sijnre groter oetmoedicheit, goetheit ende leringe wert hi in sijnre absencien paeus gecoren van alle die cardinalen; mer dye bisscoppen van Lomberdyen koren tegens hem enen anderen bi des keysers consent. Dair een grote twist ende oerloge om opgestaen is ende enen groten strijt daer om gevochten worde. Mer ten lesten, als die keyser die sake verstont, heeft hi desen paeus Alexander geconfirmeert, ende die ander bekende sijn scult ende wert in gracien genomen. Dairna is dese Alexander ghestorven ende tot Sint Jans te Latranen begraven.

124 begra AB.