Hoe biscop Adelbolt dat oude werck van den Dumkercke neder dede werpen, ende een ander werc fondeerde ende volbrochte, ende van enen bulle des lants van Threnten.
Dat XV capittel.
In den jaer Ons Heren M ende XV dede dese biscop Adelbolt ofbreken ende ter neder werpen dat oude werck dat biscop Baldryc hadde doen maken. Ende dede weder funderen ende van nijewes opmaken een nijewe fabryc ende werck, veel costeliker ende schoenre dant oude was, ende heeft dat voleindt ende volbracht int jaer Ons Heren M ende XXIII. Tot welcker dedicatie, widinghe ende kermisse Henric, keiser van Romen, die II, mit noch XII biscoppen, ghecomen is, ende hebben die voerseyde kercke ghewijt ende gheconsacreet mit groter solemniteyt in der eren des heyligen confessoers Sinte Martijns. Ende corts daerna gaf dese keiser Henrick voergeseyt die kercke van Uutrecht dat graefscap van Trenten myt een keyserlike bulle, wes tenoer is dese:
In der Name der heyligher ende onversceydenre Drivoudicheit. Henryck, by der gratien Goods keyser van Romen, altijt vermeerder des rijcks, kenlick sij allen kersten menschen dye nu sijn ende namaels wesen sullen, dat wij tot een ewighe remedie ende boete onser voersaten ende onser ende mijnre uutghecoren ghesellinnen zielen geven den kerck van Uutrecht, by onsen tijt ghestycht ende in onser presencie ghewijt in die ere des heilighen confessoers Sinte Martijns, doer bede mijnre keyserinne Konegondis ende des vaders Adelboldi, bisscop derselver kercken, Heymonis, bisscop van Verdunen ende mijnre ghetruwen grave Bertolfs, dat graefscap van Threnten doer desen onsen keyserlicken brief bi onser bevelen ghescreven tot enen ewige possessie ende besittinghe van deser tijt of. Welke donatie om in der ewicheit ghestadich vast ende van waerden te bliven, hebben wij die mit ons eyghen hant onderteykent ende myt onsen zeghele ghestarct. Ghegheven, etcetera.
Auteursrechtelijk beschermd