Van een ghifte gegeven der kercken van Uutrecht van Otto die Derde, keyser van Romen.
Dat VIII capittel.
Onder desen biscop Ansfrijt gaf keiser Otto die Derde van dier name der kercken van Uutrecht milde possessien, ghiften ende gaven, van denwelcken hi aldusdanige brieven heeft gegeven:
In der Namen der heyliger ende onversceydenre Drievoudicheit. Amen. Otto, by der gracien Goeds keyser van Romen. Wi begeren, dattet allen menschen kundich si ende openbaer, hoe dat wi tot mijnre ende der sielen mijnre ouderen remedie, doer bede ende instancie Ansfrijdt, des eerwaerdigen biscop van Uutrecht, ende Francke, ons eerwaerdigen biscops, den Heyligen Kercke van Uutrecht in Sinte Martijns eer gesticht, geven ende ghegheven hebben alle dat ambocht ende ban van Bommel, mit datter an hoert; den tollen ende dat gruyt int graefscap van Hunrugijs, graef van Teysterbant; mitter munte ende tollen van den heelen ghemeente, in enen vrien eygendom. Voert geven wi den kerck ende cloester Sinte Martijns voerseyt alle die goeden die Poppo, Roetgieren soen, int selver graefscap totten keysers dienst plach te besitten, ten ewigen dagen die te gebruyken, te besitten, te ordineren alst desen biscop Ansfrijt ende sine successoers ende nacomelingen believen sal, sonder onsen oft onser nacomelingen wederseggen. Ende omdat dit scrift mijnre auctoriteytGa naar voetnoot96 mach vast ende onverbroekerlick bliven, hebben wi dat mit onser eyghen hant ghestarct ende gheboden te beseghelen. Ghegheven op die III ydus in aprille, int pallaes van Romen, int VI jaer ons rijcks, int jaer Ons Heren IX C ende XCIX.
Auteursrechtelijk beschermd