Van die heylige keyserinne Konegont, des voerseiden keyser Henrixs huysvrouwe.
Dat III capittel.
Coninck Kaerle dye Grote, keyser van Romen, hadde enen soen, geheten Lodewijc die Goedertieren. Dese Lodewijck, onder ander sonen, hadde hij enen soen geheten Sigifridus, ende was paltzgrave van den Rijn. Dese hadde bi zijnre huysvrouwen geheten Machtelt III sonen, als Dirc, biscop van Mets, Aelbrecht, canonick van Mets, ende Henrick, paltzgrave opten Rijn, diet hertoechdom van Beyeren an hem creech, ende een dochter geheten Conegont, suverlic ende schoen, ende mit veel doechden verchiert. Dese worde te manne gegeven desen keiser Henric die II, ende leefden tesamen in alre reinicheit een engels leven, totdat si tsamen storven. Die duvel, die alle goede wercken ende doechden benijt, heeft dese heilige vrouwe doer enen valschen ridder voer den keiser besculdicht, als dat si mit enen anderen ridder te doen hadde in overspul. Dye keyserinne dede groot versaec, mer die keiser en geloefdes niet; waerom dat hi vuerige ende gloeyende yseren platen dede leggen van XV passen lang, ende dwang haer daerover te gaen mit bloten voeten. Ende als si daer over gaen soude, so sprac si ende seide: 'Almogende God, gelijken ghi mi ontsculdicht kent ende onbesmet van minen man den keiser ende van allen mannen, Here, so helpt mi in mijnre onnoselheit.' Doen sprac een stemme uuten hemel, ende seide: 'Die reine maget Maria saldi maget bewaren'; ende si ghing dat gloyende yser over mit bloeten voeten ongebarnt ende ongescent. Ende op die selve stede dede si een scoen cloester timmeren, daer si na haer mans doot XV jaer lanc in groter strengicheit ende heilicheit des levens God ende Sine lieve Moeder diende. Ende als si ghestorven was, wert si bi haren man in der Domkercke van Bamberch begraven, ende Innocencius, paeus, die IIII, heeft se ghecanoniseert ende int getal der heiligen geset opten III dach van maert.
Auteursrechtelijk beschermd