Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den strijt die grave Aernout hadde tegen die Vriesen, daer hi in doot bleef.
Dat IIII capittel.

Dese grave Aernout hadde alle die tijt dat hij grave was ende tlant regeerde, een stadighe strijt teghens dye West-Vriesen, die onder sine subjectie niet staen en wouden. Ende siet, int vijfte jaer sijnre dominatie, is daer een strijt te lande ingheset by een dorp in West-Vrieslant geheten Winckel, op een pleyn velt, daer alle die uutghesochte strijtbaer mannen van Hollandt byeen quamen om den Vriesen weder tot subjectie te brengen, als int eerste jaer gheschiet was. Als si aldus daer laghen ende verwachten die Vriesen,

[p. 111v]

leden si alle groten dorst, want daer overal omtrent niet en was, dan sout, brack water. Die grave de medeliden mit sijn volck hadde, is op zijn knien gevallen in sijn tente, God naerstelic ende ynnichlick biddende; ende siet, die grave quam uut sijn tente, ende wees hem een plaetse dye hem van God in sijn gebet vertoent was, daer si graven souden, als si deden; ende stack sijn lancie daerin, ende bevonden daer scoen, claer, versch water, daer si alle of droncken ende ghelaeft worden. Hierenbinnen quamen die wrede Vriesen mit een grote scaer volcs, ende verstoerden dat Hollantsche heer. Ende die grave mit al zijn volc ghingen hem vromelicken te gemoet, ende heefter mit alle sine machte ridderlic tegen ghevochten. Mer int eynde doer Goeds verhengenis, is hi vechtende voir die rechtvaerdicheit ende bescermenisse sijns lants ende heyl sijns volcs aldaer versleghen, mit groot verlies sijnre heren ende ondersaten, int jaer Ons Heren IX C ende XCIII des dages na Sinte Lambrechtsdach, nadat hi Hollant ende Zeelant na sijn vaders doot gheregeert hadde tot grote profiten sijnre ondersaten V jaer lang. Wes dode lichaem int cloester tot Egmont ghebrocht worde, ende aldaer mit groten rouwe begraven voer Sinte Jan Baptisten outaer. In welcke abdye dese graef vele goeden ende renten mit zijn huysvrouwe assigneert ende gegeven heeft. In den eersten int dorp genoemt Thosa, II mansen, die jaerlixs betaelden een pont ende IIII uncen. In Castrichom II mansen uutgeseyt tvierde deel, ende geven alle jaers een pont ende V uncen. Int dorp Felloson genoemt III mansen, gevende tsjaers anderhalf pont ende noch een acker, die tsjaers gheeft XXX penningen. In Vorenhout III mansen, dye alle jaers geven VI penninghen. Int dorp Noertga V mansen, die alle jaers betalen IX uncen. In der plaetsen die men hiet Lopsen IX mansen, ende noch hierboven, bi die Maerne, een manse, die alle jaers geeft VI penningen, ende in dieselfde plaets een virendeel van een manse, die alle jaers betaelt XV penningen. Int dorp genoemt Leythen, een manse, ende een sestendeel van een manse. In dat dorp Bergham genoemt, ende is ghelegen an dye westsyde van den Rijn, III mansen. Voert gaf die graef voernoemt den abdye tot Egmont die kerck van Vlaerdingen mit dye thienden, ende dyerghelijcken gaf hij tcloester voernoemt Hergham ende Schye mit hoer thienden.