Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

[p. 110v]

Van Egbert, aertsbisschop van Tryer, desen grave Arnouts broeder.
Dat II capittel.

Dese edele grave Arnout hadde enen broeder gheheten Egbert, als voer geseit is, die welke doer Godlike predestinacie ende voersichticheyt gheworden is aertsbiscop der kercken van Tryer. Want als hi int eerste in deser biscoplicker kercken was gecomen, heeft hi die mit onsprekelicke liefde, caritate ende miltheit die in hem overvloedich waren also in der ewicheyt verlicht, dat men sijnre gedachtich wesen sal so lange die werlt staet. Dese edele ende goedsvruchtighe jongeling Egbertus worde tot eenre tijt van sinen vader, grave Dirc, mit een eerlicke ende betamelicke staet van baroenen ende andere edele mannen gesonnen totten aertsbiscop van Tryer, gheheten Rutgheer; ende was int jaer IX C ende LIII. Denwelcken jongen edelen man dese eerwaerdige aertsbisscop mit groter eren heeft ontfangen, ende node hem mit hem te eten mit sine heren ende edelingen in dye hoechtijt van Sinte Pieters kerck, patroen des bisdoms van Tryer. Na den eten is hi gegaen in Sinte Mathijs kercke, des heyligen apostels, ende dede aldair sijn gebet mit groter innicheit voer die reliquien des heyligen apostels Sinte Mathijs ende der andere heyligen, dye daer begraven ende in scone cassen gestelt waren. Ende daer aldus wesende, wert hij van binnen also beroert overmidts heylicheyt ende bequaemheit der plaetsen, dat hi hem daer begaf int cloester, ende werdt monick, annemende die oerde des heyligen mans Sinte Benedictus, anmerckende datter gescreven staet int Evangelye: Die niet after en laet vader ende moder, landt⁸⁸ ende goeden, etcetera, dye en mach nyet worden minen discipel, etcetera. Ende heeft sinen vader dye sake daer hi om uutghesent was mit sinen heren wederantwoert ghesent, ende bleef daer God dienende in reinicheyt ende heylicheyt des levens, dach ende nacht wakende in den diensten Goeds, ende was allen menschen een exempel om wel te leven. Daerna, in den jare Ons Heren IX C ende LXXV, als die aertssche bisscop Dirck van Tryer ghestorven was, soe werdt dese Egbert eendrachtelicken van al den canonicken ghecoren tot enen aertsche bischop van Tryer. Ende als hi geconsacreert ende ghewijt was, heeft hi alle sine vrienden ende magen oetmoedelicken ghebeden te comen tot sijnre feesten ende intronisacye oft inleydinghe. Die welcke hem bereit hebben mit groter pompositeyten ende costlicheden, ende quamen bi hem in der stadt van Tryer, daer si allegader mit groter eren ende feeste worden tracteert. Die feeste gedaen ende gheeyndet wesende, heeft hi mit oetmoediger beden van sine vrienden vercregen vele costelicke cleinoden ende gaven van goude ende silver dye sy hem minlicke gaven, ende thuyswert comende hebben si hem noch vele costlicker ende precioser cleinoden van silver ende goude gesonnen, dan si hem ghelaten hadden, tot ene rechte aelmisse ende quijtsceldinge hoerre sonden; mit welcke cleinoden, ghelden ende goeden hi sijn kercken van Tryer van den ongelovigen Denen ende andere quade kerstenen ghespoliert ende beroeft, grotelicken ende mildelicken mit gouden ende silveren cruycen, kelcken, casuffelen, alven, rocken, cappen, syden gardinen ende andere costlicheden heeft verchiert, beghift ende vermeerret. Dye cloesteren, die van hoerre goeden, renten ende possessien waren beroeft, heeft hij mit groter moghentheyt weder gherepareert ende opghemaect. Die vasteldaghen ende dye cruysdagen om der stat van Tryer mit der heylighen reliquien, om der droecheyts willen der aerden, heeft hi ingeset te gheschien in die derde weeck nae Paesschen. Hi vant oec op Sinte Eucharijs kerchof dat lichaem des heylighen confessoers Sinte Celsus. Dese bisscop Egbert van Tryer, ende biscop Dirck van Mets, sijn ghetogen int jaer Ons Heren IX C ende LXXVIII mit keyser Otto in Ytalien daer si bleven drie jaer lang, ende vergaerden daer vele heilige reliquien ende lichamen, die si neder senden tot horen kercken. Bischop Egbert, mits hulpe des

88 lantdt AB.

[p. 111r]

keysers, heeft hi vercregen in der stat van Trenten dat lichaem des heylighen mans Sinte Seveer, daer Sinte Gregorius of scrijft in sine boeken Dialogorum: Hi vercreech oec in die stat van Spoleten dat lichaem des heyligen martelaers Sinte Gregorius, ende dat hooft van Sinte Ponciaen, martelaer, ende die reliquien der heyligen Felicis ende Regule. Die biscop van Corphoen heeft gegeven op die tijt den biscop Dirck van Mets dat lichaem der heyligher maget ende martelaersse Sinte Lucien van Siracusen, dat swerende ende certificerende, mit sijn hant te leggen op die heilige Evangelien, dat dit die reliquien waren derselver maget Lucien, geboren van der stat van Siracusen, dair die Heilige Kercke jaerlixs hoechtijt of hout, dat welcke lichaem hi voert deen helft gaf doer oetmoedige begheerten dese biscop Egbert van Tryer. Doer naerstige ondersoekinge heeft dese biscop Egbert Sinte Pieters staf, die lange verloren hadde geweest ende bi Sinte Maximijns tiden⁸⁹ totter stat van Mets, doer wisen raet om der wreder Denen willen gevlucht was, weder in die kercke van Tryer gebrocht heeft. Men seyt, wat swaluwen daer comen vlieghen in Sinte Pietsers Domkercke, die sijn vermaledijt ende sterven van stonden an als si dairin vliegen. Ende dat daerom: op een tijt stont dese eerwaerdige biscop in sijn misse, ende daer quam een swaluwe vliegen ende smelte hem op sijn hoeft, waerom dat hi mit sijnre ghebeden van God verwerf datter gheen swaluwen in leven mochten. Op een tijt, als Sinte Eucharius hoechtijt nakende was, is hi darwerts gegaen int cloester, om den dienst Goeds te doen. Ende als die dienst Goeds was gedaen, begeerden die broeders oetmoedelicken hem te willen gewaerdigen daer te bliven eten. Mer die heilige man ontsach hem dat cloester ende broeders moyelic ende lastich te wesen, overmits sine grote familie ende gheselschappe van dienres, haeste hem weder te keren in die stat, ende wert mit haestiger siecten bevanghen, daer hij corts na of starf. Ende wert mit groter eren ende feesten begraven in een clein kerckgen dat hi selver hadde gefondeert ende gesticht in der eren des heyligen apostels Sint Andries an die rechter hant, ende an die lufterhant hadde hi doen leggen sijn voersaet biscop Henrick die Derde van Tryer, die in Ytalien gestorven was, ende hadden mit hem daer gebrocht ende dair begraven. Dese eerwaerdige biscop van Tryer, Egbertus, hadde een ewige memorie ende gehoechnisse bi sinen leven gelaten ende gemaect den cloester van Egmont, als een groot stuck van den Heiligen Cruyce, in gout costelicken beslagen, mit eene casuffele, missael ende een Bibel, een scone rock ende een costelicke gordel van gout gemaect, ende een silveren kistgen mit vele scone ende costelicke reliquien ende heylichdommen, ende als men goedertierlic gheloeft een groot deel des lichaems der heiliger maget ende martelarsse Sinte Aechte, mit veel andere reliquien ende costelijcke gescreven boecken, die men noch siet leggen opter librarien. Dese eerwaerdige biscop, here Egbert, starf int jaer Ons Heren IX C ende XCIIII.

89 verkortingsstreep boven de e is beschadigd; AB.