Hier beghint die seste divisie, ende heeft V capittelen.
Van Arnulpho of Aernout, den derden graef van Hollant, grave Dircs soen voernoemt.
Dat I capittel.
Arnulphus of Aernout is nae sijns vaders doot gheworden die derde grave van Hollandt ende Zeelant, ende hadde alle die daghen sijns levens een stadige strijt ende oerloge teghen die West-Vriesen die teghen hem rebelleerden. Ende int eerste jaer sijnre dominacie heeft hij een groot heer van volc vergadert, ende toech daermede in Vrieslandt, daer hi den Vriesen mede brochte tot subjectie ende onderdanicheyt. Mer si en bleven daer niet langhe in staende. Dese grave hadde te wijf genomen by sijn vaders leven Luytgaert, des keysers Theophaens dochter van Constantinopolen of van Griecken, ende was Theophanien suster, dye ghehuwet was an keyser Otto die Anderde, daer hi an wan keyser Otto den Derden. Ende aldus was dese Luytgaert sijn moye, dat is sijn moeders suster. Waerom dat hij oeck gaf Dirck den anderden grave, desen Aernouts vader, dye milde gaven ende ghiften voerseyt, opdatter oeck nae des graven Dircks doot, desen Aernoudt profiteren ende te stade comen soude. Dese grave Aerent vercreech an den derden keyser Otte, dat hij voertan ewelicken vry sitten soude van den rechten keyserlijcken leen mitter graefschap van Hollandt, daer dye graven van Hollandt mannen der coninghen van Vrancken of gheweest hadden, ende dat werdt hem beseghelt tot enen vrien leen. By dese Luytgaert wan grave Aernout twee sonen, als Dirck, dye na hem grave werdt, ende Zijphrijdt, prefect ende stadthouder van Kenemerlandt.
Auteursrechtelijk beschermd