Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat lichaem van Sinte Jeroen gevonden wert.
Dat XVII capittel.

Als dese goede man Nothbodt in goeden wercken van vasten, bidden ende aelmissen te geven hem oeffenende was om dit visioen te ondervinden warachtich te wesen, so ist geboert op een tijt dat dese Nothbots paerden gaende in der weyden, ghestolen worden, ende waren gebrocht int binnenste van der bosschagie, ende an enen boem gebonden. Dit vernemende, is hi uutgegaen mit sijn knechten ende andere luyden, om te soeken waer die paerden gebrocht mochten worden. Ende als si alle den dach hadden⁸⁵ gegaen sijn si gecomen omtrent den avont by der plaetsen, die hem twemael was geopenbaert, dair dat heilige lichaem lach, dwelcke hij nu noch nyemant en hadde te kennen gegeven; ende geboet hem allen dien nacht haer moede leden te rusten ende daer te bliven. Ende als si wat hadden gegeten ende hem te rusten hadden gestelt, so heeft hem die heilige martelaer Sinte Jeroen in der nacht geopenbaert enen simpelen ende onnoselen lantman, die daer mede lach ende sliep, seggende: 'Staet op, ende segt Nothbodt, dat hi voertan niet en versmaede die Godlicke geboden. Ende int oestende des bosch, an die rechterhant dair hi desen nacht geslapen heeft, sal hi mijn graf vinden. Ende gaet voert in dit naeste bosch; daer sal hi sijn paerden vinden gebonden an enen boem.' Als hi wacker worde, heeft hi sijn medegesellen vermaent, dat si op souden staen; want overmits der Godlicker openbaringe, souden si sonder enighe swaerheit die paerden vinden. Ende comende int bosch sagen si van verde die paerden staen, gebonden een stucke weges van den rechten wech. Nothbodt dit horende, datter noch een getrou bode ende ghetuger bevonden was, is seer verblijt geweest, ende heeft mit hem genomen desen simpelen lantman, ende bestonden mit houbilen ende graven te soeken die plaetse die hem gheopenbaert was, ende sagen besceydelicken die steenkens overgeleyt opt graf des heyligen martelaers. Ende sijn van stonden an gegaen totten bisscop Baldrijck van Uutrecht ende tot grave Dirck van Hollant, dese sake ende dit visioen te kennen gevende, ende dat si souden comen ende opboeren dye reliquien ende brengen die ter plaetsen voer geseyt. Van welcker boetscap die bisscop ende die grave sere verblijt waren, ende geboden alle dat volc III dagen te vasten om bequaem te wesen der toecomender feeste ende

85 haddden AB.

[p. 109r]

vindinge der heyliger reliquien. Ende als si dat lichaem opgegraven hadden, quam dairuut enen uutermaten soeten roec, waerbi si verstonden dat die heilige martelaer Sinte Jeroen bi God van groter verdiensten ende estimatien was. Ende namen dat gebeent, ende wonnent in enen sconen linnen doeck, ende bestonden dat te dragen op haer scouderen, met love ende sange ende met groter feeste. Ende als si quamen opten oever van der zee, op een plaetse genoemt Rijnmeer, quam al dat volc van daeromtrent, ende begeerde mede mit groter ynnicheit dit heilige lichaem te dragen. Ende dus voertgaende ende vast moede worden, beruspten si hemselven, dat doe si noch int bosch waren, dat si geen baere gemaect en hadden om te lichtelijcker dat lichaem te dragen. Ende dus vertwifelt staende, haer ogen om ende om kerende, sagen si int diep van der wilder zee een baere comen driven, ende worde mitten golven ant lant geworpen. Ende die nemende, setten si die tombe mitter reliquien daerop, ende droegen dat also mit groten love ende sange, ende brochten dat mit blischappen in Sinte Aelbrechts kercke tot Egmondt.