Hoe dat hem God begaeft hadde mitten geest der prophecien, ende hoe hem die Moeder Goeds, Maria, openbaerde.
Dat X capittel.
Dese eerwaerdige heilige biscop is oec verchyert ende begaeft gheweest mittet woert der prophecien, ende heeft sine secrete ende heimelicke vrienden vele toecomende dingen geseyt. Op een tijt is bi hem gecomen een edel jongeling geheten Baldricus, dair grave Lutghaert die X grave van Cleve een oudevader of was; ende brocht mit hem II jongelingen uuten lande van Cleve tot desen heyligen biscop Rathbout, hem oetmoedeliken biddende dat hij se wilde promoveren ende ordineren totter priesterlicker staet. Doen wert die heilige man soetelic lachende, ende seide: 'Mijn lieve hertelicke zoen, van nu of III jaren, als ic oflivich geworden bin, suldi wesen een harder ende biscop deser kercken, ende sult dan dese II clerken mit u eygen hant wyen ende consacreren totter priesterlicker oerde, ende sult dese kercke mitter sale ende dese gansse stat weder repareren ende op maken als si tevoren was.' Daernae ist gheboert, dat dese heylige man gereyst is int lant van Trenten, ende is daer mit groter siecten bevaen gheworden ende te bedde gevallen. Denwelken die gloriose Maget Maria verseilt wesend mit die heylige joncfrouwen Agnes ende Tecla, mit groter claerheyt geopenbaert heeft, ende sprac den heylighen man toesegghende: 'Mijn lieve soen, en ontsiet u niet mi hier voer u te sien teghenwoerdich, dyen ghi so dicke mit groter ynnicheit absent wesende gegruet hebt; ende weest des seker dat ghi dese siecte ontgaen, ende daer van genesen sult, mer nochtans en suldi nyet lange in dit tegenwoerdige leven bliven.' Ende met dien so ghing die claerheit wech; mer dair bleef een uutermaten soeten roeck bi hem. Dye biscop is van deser siecten genesen geworden, ende heeft sommige van sine secrete familiare vrienden geseyt ende geintimeert, hoe uutnemende scoen ende claer dat was die gedaente ende dat aensicht der gloriosen maget Marien.
Auteursrechtelijk beschermd