Keyseren.
Anno VIII C ende LVI.
Lodewijc die II, als hi mit zijn vader als Roomsche coninc V jaer regneert hadde, is hi na zijn vaders doot alleen geworden keyser van Romen, ende regneerde in groter mogentheyt dat keyserryc XXI jaer lang. Dese Lodewijc gaf Lotharys zijn vader, nadat hi monick geworden was, dat keyserrijc over, ende doe hi toech na Ytalien om den croon te ontfangen, sijn hem die burgeren van Romen mitter ecclesie mit crucen ende vanen te gemoete gecomen, ende geleyden hem voer Sinte Peters sacristie, daer doe Sergius die paeus was, ende ontfing hem myt groter bliscappen ende eren, ende croonde hem op die octave van Pynster in Sinte Peters kerck; ende al dat hi begeerde, dat gonde ende gaf hi hem. Daerna is hi vredelic van Romen gesceyden, ende toech tot Papien, daer hi meest alle die tijt zijns levens geseten heeft, so vandaen te Romen, ende wederom van Romen tot Papien, ende wederom van Romen tot Papie reysende. Dese Lodewijc leedt oec mede grote vervolging ende conspiracie van zijn soon Kaerle, waerom dat hi van den duvel III dagen lang seer gequelt wert, ropende mit luder stemmen voer alle die princen, dat hi alleen rechtelic dit verdriet leedt, want hi tegen sijn eygen vader conspiratie gemaect hadde, tot een exempel van allen rebellen kinderen. Desen keyser Lodewyc openbaerde die gestorven keyser Lotharys, zijn vader, beswerende hem in der name der Heiliger Drievoudicheit, dat hi hem soude vrien van den tormenten ende pijn die hi leedt, waerom dat dese Lodewyc sende tot vele cloesteren grote aelmissen, om zijn vader Lotharium te helpen tot verlatenis ende lichtinge sijnre pinen. Hieruut wort ons gegeven te verstaen dat, hoewel die keyser Lotharijs veel goeds hadde gedaen dat God ende den menschen ontfanclic was, nochtan heeft hi in sijn rijc vele dingen togelaten, die God contrarij waren. Aldus en worden die menscen bi wilen van God niet alleen gepinicht om hoer eygen zonden ende quade wercken, mer oec om der geenre zonden willen die gedaen worden, die si wel beletten mochten, ende daer si een oersaek of zijn. Ten lesten starf dese goede keyser Lodewyc in vreden.
In desen keyser Lodewycs tijden reghendet tot Brixien in Ytalien III daghen ende III nachten bloet van den hemel.
In Walslant worden oec gesien sprinchanen mit VI voeten ende VI wyeken sonder getal, ende vlogen dicht onder malcanderen, ende vernyelden al datter groen ende wasber was; ende alst al opgegeten was, zijn se opgevlogen in dye lucht, also dicht, dat men die zonne nau gesien en conde, ende vielen in die Bertaensche Zee, daer se verdronken; ende worden van den golven an tlant geworpen; van welcken dat een grote generale pestilencie quam over al Walslant ende Duytslant.
In desen tijden worde die stat van Ments IIII jaer jammerlick doer enen sienliken bosen geest gequelt. Hi ontstack openbaer mit vuer die husen an, dat si branden; hi steende ende werp mit stenen den priesteren, die dat wywater worpen, ende doer desen liepen vele luden uuter stede, ende en doerstens daer niet langer onthouden.
Auteursrechtelijk beschermd