Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Dat XCI capittel.
Hoe dat Ludgherus gecoren wert die X biscop tUytrecht.

Ludgherus, geboren uut Frieslant, wert na den doot des eerwaerdigen vaders Adelbrici, gecoren eendrachtlic van der ecclesie tot enen biscop van Uutrecht. Ende wert investeert ende geconfirmeert ende in sinen biscoplicken stoel geset te wesen die X biscop der kercken van Uutrecht. Hi was een seer gheleert man in Godlicken scriften, vreedsaem, milt ende redelick

[p. 84v]

van leven. An sinen tafel ende binnen sine hove en hoort men anders niet spreken dan van die Heylige Scriften. Hi was onder sine medebroederen die eerste int werck ende in den dienst Goeds, ende die leste daer weder uut; mit rypicheit ende manierlicheit van zeden tempereerde hi sine vrolicheit ende blischap. Bovenal beminde hi reinicheit ende soberheit, castiende sijn leden mit vasten ende soberheit, mit waken ende bidden, opdat hi in den hemel mit Cristo ewelic mochte leven. Als hi dan die Heylige Kerck van Uutrecht ende sinen bisdom lovelic ende eerlic hadde geregeert ende berecht XI jaer, is hij mit vele doechtlicke wercken vervolt wesende gestorven int jaer ons Heren VIII C ende LVI, op Sinte Jorijsdach, ende wert mit betamelicker uutvaert in Sinte Salvatoers Kercke begraven.