Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Paeusen.
Anno VIII C XLVI.
Dat XC capittel.

Leo die IIII was die C ende VII paeus, ende sat VIII jaer, III maenden ende VI dagen. Hi was een geoerdent ende religioes man van groter onnoselheit, wijsheit ende goetheyt. Hi heeft vernyewet die mueren ende poorten van Romen, die van outheit seer vervallen waren, ende timmert se van nyewes op mit XV toornen. Hi verdreef die Saracenen comende tegens den Romeinen te stride op twater mit die collecte oft tgebet van Sinte Pieter ende Pouwels, die die Heylige Kercke houdet op haer beyder octave. Comende weder te Romen na dese victorie, bemuerde hi doer bede der senatoren den plaets Vaticanum genoemt, daer Sinte Pieters kerck in staet, die die heydenen ende Saracenen lichtelic plegen te beroven, ende noemde se na sijn eyghen naem Leonina. Tot welcker bouwingen ende timmeraedsie die keiser Lotharijs mit sijn broederen Lodewijck ende Kaerle die Caluwe merckelic ende mildelick uut groter devocien grote ghiften ende gaven contribueerden ende senden. Ende als hi die doeren van Sinte Pieters kerck, die die Saracenen ofgenomen hadden, weder vernyewet ende daer an ghehangen hadde, maecte hi die collect van Sinte Pieter, die men op sinen dach hout, als opten eersten dach van oestmaent. Mit aldusdaniger wercken vervolt is hi gestorven ende begraven mit groter droefheit in Sinte Pieters kerck, wiens feestdach men hout opten XVI dach van Oestmaent.

Joannes die VII was die C ende VIII paeus, ende sat II jaer, V maenden ende VIII dagen. Dese was een vrouwe geboren uut Engelant, oft, als sommighe segghen, uut Duytslant, van Ments, ende wert van haer buel in mans clederen tot Athenen ghebrocht in Griecken. Si was so in der Heyliger Scrifturen geleert, dat hoers gelijc niet en was. Ende quam van Athenen tot Romen, ende hadde daer vele grote ende vermaerde discipulen. Ende als si III jaren tot Romen gestaen hadde, wert si eendrachtelic paeus gecoren, ende wert bi een haer dienres mit kinde gemaect. Ende als si in der processien ghing van Sinte Pieters kerck tot Sint Jans te Latranen, ende si hoer tijt niet en wiste, wert si mitten baren belopen omtrent Sinte Clemens kerck, ende baerde daer, ende bleef doot, ende wert daer begraven. Ende dit is die VI paeus gheweest die den naem ende eer der heylicheit sonder werck gedragen heeft. Waerom dat hi, als andere, geplaecht wert van God; ende en wert oec van sommige cronyke scrivers in de linie ende ordene der paeusen niet geset. Mer om tgetal te vervollen van den name Joannes, dier vele geweest sijn, so setten wi hem hier mede. Ende omdat dese paeus uut Duytslant was, van Ments opten Rijn, so menen sommige dat dit die sake is dat men ghenen gheboren Duytssche meer tot paeus en settet ende kiest, dat so niet en is; want hierna noch vele paeusen geweest sijn uut Duytslant geboren.