Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Keyseren.
Anno VIII C ende XL.

Lotharius deerste van dier namen, Lodewijcs des goedertieren soen, wert keyser na sinen vader, ende regeerde XV jaer. Dese, want hi die outste soen was des keysers Lodewijcs, so onderwant hi hem des rijcs alleen. Mer als hi IIII jaer alleen aldus geregeert hadde, begant sine andere broeders te verdrieten dat si aldus van hoer vaderlicke erf beroeft ende verstoten waren; ende bysonder om trijck van Aquitanien, dat hoer beyder broeder Puppijn mitter doot geruymt hadde namen si onderling grote twist an ende oerloge, ende vergaerden tesamen in een wijt velt in Francrijck, Fontaneten genoemt, by der stat Altisiodorum oft Anzeroijs, daer een grote bloedige strijt gevallen is, ende een ontallic volc an beyden siden verslegen, meer dan ye onder den Franchen heren geschyet oft gehoort is, ende verdreven malcanderen mit oerlogen so seer, dat si hoers selfs vianden niet wederstaen, noch hoer landen bescermen en conden, also dat die Saracenen ende Turcken oersaeck daeruut namen vele landen in kerstenhede te verwoesten ende destrueren. Die soldaen quam om te verwoesten Ytalien ende Romen, die Noormannen Sassen ende Friesen int keyserrijck ende in Francrijck, dat is Walslant ende Duytslant. Waerom dat die paeus Sergius sende uut notabele ende strenge legaten mitten biscop van Ravenne om dese III broeders te verenigen, dwelc also geschiet is. Ende Lotharijs behilt dat keyserrijck mit heel Austrasien, oft Oest-Francrijck, ende een deel van tlant dat van sinen naem nu Lothoringen genoemt is, als voer geseyt is. Lodewijck behilt Duytslant mittet lant van Beyeren; Kaerl die Caluwe worde toegeseyt ende assigneert alle tlant van der Brytaensscher zee totter Masen toe, dat heel West-Francrijck, dat nu ter tijt Francrijck hiet. Doe dit aldus gheschiet was, wert die keiser

[p. 83v]

Lotharijs verwandelt in een ander man, beroert uut Godlicker gracien mit leetwesen zijnre voerleden sonden ende bisonder der groter rebellicheit die hi tegen sinen vader den godertieren keyser Lodewijck hadde gepleecht ende misdaen, ende nam een geestlic habijt an, profiterende ende beleyende die heilige regule int cloester tot Pruimen gelegen, in Oudt Ardennen, tusschen Aken ende Tryer, dat men nu hiet in der Eyfelen, nadat hi zijn III sonen elck zijn deel bewesen hadde, gevende Lodewijck dat keyserrijck, Lotharijs den II Lothoringen, ende den III, Kaerle, tlant van Provincien, mit een deel van Borgondien. Ende als hi weinich tijts in der oerden hadde geweest is hi gestorven. Ende als hi lach ende starf, wert daer een grote strijt ende twist tusschen den engelen ende den duvelen, die hebben wouden des monics siel, ende togen dat lichaem hier ende daer, dattet die monicken besceydelicken sagen. Mer als die broeders hertelicken ende innichlicken voir hem baden, worden die duvelen verjaecht, ende die engelen behielden die siele. Ende dat lichaem wert daer begraven, int jaer VIII C ende LV.