Hoe dat Harmacarus die VI biscop van Uutrecht gecoren wert.
Dat LXXIIII capittel.
Harmacarus, geboren uut Frieslant, wert na den doot des eerwaerdigen vaders Theodardi van den capittelaren ende canonicken die vi. biscop der kercken van Uutrecht. Hi was seer vuerich in der lieften Goeds, ende plach alle dage den Vader Sinen enigen Zoen te offeren in den Sacramente des Heiligen Outaers, biddende altijt sonder ophouden voer tghemeen kersten volc, ende voer die Heylige Kercke van Uutrecht, ende alle sine ondersaten, in welcken arbeyt ende religie hi ten lesten zijn leven geeyndet heeft, ende is salichlicken in den Here ghestorven, vol doechtlicker wercken, als hij die Heylige Kercke van Uutrecht ende dat bisdom hadde regeert ende beseten XXVII jaer, te weten XIIII jaer onder coninc Kaerle die Groot, ende XIII jaer onder coninc Lodewijck, zijn soen, keyseren van Romen, ende wert mit groter eren ende betamelicker uutvaert begraven in Sinte Salvatoers monster, bi sine medebiscoppen ende voervaderen, int jaer VIII C ende XXVII.
Auteursrechtelijk beschermd