Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Griecken in Ytalien quamen, ende van den coninc verwonnen ende verdreven worden.
Dat LVI capittel.

Int jaer VII C ende LXXXVIII, als coninc Kaerle dese victorie opten Slaven ghehadt hadde, sijn die Griecken seer toornich geworden, benyende des conincs geluckige ende victoriose fortunen. Ende quamen weder mit groter macht in Ytalien mit Adalgijs, coninc Desiderius' soen van Lomberdien, die tot Ludick gevangen lach als voorseit is, ende na sijns vaders gevangenis over in Griecken gelopen was, bi den keyser Constantijn, ende was van hem gemaect cappetein ende hooftman der Griecken. Mit desen Adalgijs quamen die Grieken in Ytalien so dat rijck weder te conquesteren, ende zijn vaders leet ende injurie te wreken. Tegen diewelcken coninc Kaerl sonder merren sinen prefect ende hooftman mit groot volc van wapenen gesonnen²⁷⁷ heeft, ende na vele ende sware striden werden die Griecken verjaecht ende bi groten getale gheslegen, ende Adalgijs wert gevangen, ende mit menigerley pinen ende tormenten van den Franchen int eynde ghedoot.

277 gesoñnen AB.