Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat Gregorius, biscop van Uutrecht, oflivich worde.
Dat XXXIII²⁵⁴ capittel.

Hierna, doe dese heilige man Gregorius²⁵⁵ LXX jaer out geworden was, is hi seer gichtich geworden; ende was daerof III jaer lang gequelt. Mer hi dede nochtans die Heilige Scriften voir hem lesen, ende Davids salmen singen. Ten lesten, doe die ure zijns doots nakende was, dede hi hem

254 XXXII AB.

255 gregorlus AB.

[p. 64v]

brengen van sine discipulen in Sinte Salvatoers Monster; ende als hi aldaer sijn ghebet uuter herten gestort hadde, ende dat²⁵⁶ Heylige Sacrament ontfangen, gaf hij God den geest weder over, dien hi lange tijt mit groter devocien hadde gedient, ende wert mit groter eerwaerdicheit in die voernoemde kercke begraven int jaer ons Heren VII C ende LXXXIIII, opten XXV dach van²⁵⁷ oestmaent, als hi dat bisdom van Uutrecht mit groter naersticheyt ende mit duechtlicke exempelen hadde berecht XXXII jaer lang.

256 dat dat AB.

257 aldus A; va B.