Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Paeusen
Anno VII C LII.
Dat XXV capittel.

Stephanus die II was die XCV paeus, ende sat V jaer, een maent; hi was een man van groter religie, wijsheyt ende leringe, ende sant sine legaten totten keyser Constantijn die V om hulp ende bystant tegen den coninc van Lomberdien, mer hi en deets niet, want die coninc Sinte Pieters patrimoni ende al dat der kercken van Romen toebehoerde destrueerde ende verwoeste, waerom dat die paeus selver in persone in Francrijc getogen is tot hertoge Puppijn van Lotrijck ende Brabant, die alsdoe dat huys ende croen van Francrijck

[p. 61v]

regeerde, want die coninc Chilperijck daertoe onbequaem was. Ende Puppijn mit sijn wijf ende kinderen hebben den paeus III milen te gemoet gegaen, ende mit groter eerwaerdicheit ontfangen, sine voeten gecust, ende sijn mule by den thoom geleyt tot in sijn logijs, daer hem die paeus mit groter droefheit declareerde dat jammer der Roemscher kercken, begerende, dat hi Sinte Pieters patrimony ende goeden bescermen wilde. Ende die paeus heeft hem gesalvet tot enen witlicken ende erflicken coninc van Francrijc, mit alle sine geslachten, ende heeft dat keyserrijck van Romen translateert ende overgeset van den Grieken totten Francken ende Duytschen. Ende als hi vele kercken die die Lomberden gedestrueert hadden vernyewet ende repareert hadde, is hi gestorven, ende wert tot Sinte Pieters begraven.

Paulus was die XCVI paeus, ende sat X jaer, een maent; hi was een sachtsinnich ende goedertieren man, een beschermer der weduen ende wesen, milde in aelmissen te geven; hi vervoerde Sinte Petronillen lichaem van buten der stadt ende brochtet in Sinte Pieters, hoers vaders, kercke, ende leydet daer in een marmoren graf. Als hi doot was, wert hi daer mede begraven. Ende dat paeusdom vaceerde I jaer ende I maent.

Constantinus die II was die XCVII paeus, ende sat een jaer. Hi wert mit gewelt ende mit ghiften paeus gemaect, ende wert van een simpel leeck in een paeus angenomen. Ten lesten is van den Romeinen geestlic ende waerlic gecoren tot enen paeus Stephanus, ende Constantijn wert in een cloester ghesteken.

Stephanus die III was die XCVIII paeus, ende sat IIII jaer, V maenden. Ende dede terstont vergaderen een concilium van veel biscoppen uut Ytalien ende Walslant, in denwelcken Constantijn ende alle sine wercken ende ordinancien condemneert worden, uutgeseyt dat doopsel ende creesdom. Ende hebben voert ingeset dat hem voertan niement en soude presumeren paeus te worden, ten waer dat hi doer die graden der Heyliger Kercken totten priesterlicken staet gecomen waer; ende dat, opten ban ende ewige maledictie. Ende als hi vele goede wercken volbrocht hadde, is hi ghestorven ende tot Sinte Pieters begraven.

Adrianus, van dier namen deerste, was die XCIX paeus, ende sat XXIII jaer, X maenden, XVIII dagen. Hi was een grootmoedich ende stantachtich man, ende heylich van leven. Hi ontboet coninc Kaerl die Grote dat hi in Lomberdien quame, ende bescermde die Heylige Kercke van Romen, als hi dede. Hi hilt een concilium van III C ende L biscoppen in denwelcken princepalicken die ketterye van den beelden te vernyelen condemneert ende te niet gemaect wert. Hi dede oec die muren ende kercken van der stat sere verbeteren ende vernyewen, ende starf ten lesten salichlic, ende wert tot Sinte Pieters begraven.