Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van een twedracht die daer opstont tusschen den aertsbiscop van Coellen ende den aertsbiscop van Uutrecht.
Dat XXII capittel.

In desen tiden isser een grote discensie ende twedracht opgestaen tusschen der kercken van Coellen ende Uutrecht, want here Hildegaert, aertsbiscop der kercken van Coellen, vermat hem, ende seyde dat die stat ende kercke van Uutrecht toebehoerde sine metropolitaen kercke, want se coninc Dagobert van Francrijck, deerste van dier namen, hem gegeven hadde. Ende daertegen seyde dese here Bonifaes, aertsbiscop van Uutrecht, seggende ende allegerende dat dye stat ende kercke van Uutrecht stont sonder middel onder die protectie des paeus ende stoele van Romen. Op welke contreversi ende twedracht dese here Bonifaes enen brief tot Romen sende an den paeus Gregorius die II, insinuerende ende hem verclarende die sake waerom dat die aertsbiscop van Coellen hem vermat dese stat ende kercke hem te wesen ende onder sine bisdom te staen, overmits dat se coninc Dagobert voornoemt, die die eerste kercke in die ere van Sinte Thomas, apostel, daer gesticht wesende, hem ghegeven hadde. Mer also Sergius die paeus, deerste van dier namen, den eerwaerdigen ende heyligen man Sinte Willeboort gewijt ende consecreert hadde den voornoemde Willeboort tot enen aertsbisscop des stat ende der kercken van Uutrecht, te staen sonder middele als een metropolitaen ofte aertsbiscoplicke kercke onder den paeus ende stoel van Romen, so en woude dese biscop Bonifaes hem niet setten als een suffragaen ende dienre des aertsbiscops van Coellen, mer hi woude bliven ende staen sonder middele, als een aertsbiscop toebehoert, onder den paeus ende stoele van Romen; mer niettemin, so begeerde hi oetmoedelicken van den paeus Gregorius voornoemt, hierof te hebben bescheyt ende antwoert, wat hi doen ende laten soude, want hi hem geheel ende al stelde ende submitteerde onder dat seggen ende uutsprake des paeus van Romen. Mer aleer hi hierof antwoert creech, wert hi eylacen voer dat heilige kersten gelove gemartelijt, als ghi na horen sult.