Hoe dat Sinte Willeboort ende Switbert mit horen medegesellen dat Woort Goods openbaer predicten.
Dat XI capittel.
Doe in aldusdaniger manieren coninc Rathboldt van den duvel bedrogen ende gestorven was, so mochten Sinte Willeboort ende zijn medegesellen vry al Hollant ende Vrieslant doer, sonder letsel, dat Woort Goeds prediken ende dat volc leren ende dopen. Ende om dit te bet te volbrengen heeft hi vele priesters geordineert ende gewijt ende die in een ygelick dorp gesettet, mit dyaconen ende clercken, die hem in dit heylige kersten wech souden helpen ende preken, ende overmits den dienste Goeds, die si dagelixs in veel plaetsen ende kercken deden. Ende dit hebben princepalic dese heylige mannen voornoemt mit Sinte Willeboort begonnen in die grote stat Batavodurum, dats Wijck te Duersteden. In welcke stat si leerden ende preecten dat volc II jaer lang, ende brochten se totten heyligen kersten geloveGa naar voetnoot233, ende vernyelden alle die afgoden, ende wyeden ende consecreerden die tempelen der afgoden in kercken, ende fondeerden oec vele kercken van nyewes mit hulpe ende onderstant des prince van der stede, Ghontier van Andeghen, wiens soen Splinter van Andeghen genoemt, die in den Rijn verdrenct was, Sinte Swigbertus van der doot weder verwrect hadde als voorscreven staet. Ende sijn uut dese stat van Wijck getogen, niet alleen in Vrieslant, Lottringen ende Brabant, mer oec in Denemarcken ende andere provincien ende landen, prekende ende lerende den volcke dat heylige kersten gelove. Mer quamen altijt int eynde wederom totter biscoplicker stat van Uutrecht, ende vertelden hoer mede bruederen ende pristeren, wat wonderlicke wercken God almachtich, doer hemluden gedaen hadde mit groter dancbaerheit.
Auteursrechtelijk beschermd