Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die heylige man Sinte Wilfrijt ende Sinte Wigbert dat heylige kersten geloven alre eerst in Vrieslant predicten.
Dat II capittel.

Na der geboerten ons Heren VI C ende LXXVII regeerde een coninc in Neder-Sassenlant of Vrieslant, genoemt Adgillus, ende was des voerseyden coninc Beroalts soen van Vrieslant, die van den groten coninc Lotharijs verslagen was, als voerseyt is. In desen selven tiden was een heylich man eerst biscop van Lindesfern, daerna van Mercien, ende ten lesten aertsbiscop van Jorcke, genoemt Wilfridus. Dese hadde opgenomen tot Romen te trecken om sonderlinge saken te expedieren ende te scicken, ende is te scepe gegaen om over te seylen, ende wert mitten winde versteken an die landen van Neder-Sassen oft van Vrieslant. Ende wert aldaer van den coninc Adgildus, ende van den heydense Vriesen, eerlicken ende minlicken

[p. 53v]

ontfangen, ende bleef daer leggen die hele winter lang. Ende bestont hem te kondigen ende prediken dat heylige kersten gelove, ende heeft sommige van den Friesen ende Hollanders totten heyligen gelove gebrocht ende gedoopt. Ende als hi een wijl tijts daer gelegen hadde, is hi weder van daen gereyst. Hierna heeft sinte Egbert, die oec biscop van Joricke was, gesonnen sinen discipel, een heylich man ende priester genoemt Wigbertus, om in der Neder-Sassen ende Vriesen lant mit noch II heylige mannen ende priesteren om den ongelovigen heydenen te kondigen dat Woort Goeds. Mer overmits des duvels ingeven is dat volck mit horen coninc Rathboldt van Vrieslant in hoer dwalinge gebleven, ende Wigbertus en heeft daer gheen profijt noch vrucht mogen doen. Ende is wederom in Engelant gecomen, na datti aldair II jaer lang tevergeefs dat Woort Goeds mit groter vuericheit gepredict ende gekondicht hadde, int jaer VI C ende LXXXI, onder den coninc Radtbolt, Adgildussoen voornoemt, van Vrieslant.