Hoe dat Julius een strijt hadde tegen den coninck van den Duytschen, genoemt Ariovistus.
Dat II capittel.
Hierna heeft Julius Cesar enen swaren groten strijdt gehadt tegen den Duytschen ende horen coninck Ariovistus, die mit veel volcx te velde quam tegen Julius, te weten mittet volck die men hiet Arudes Marcomanni, dat is denghenen, die hi onlancx te voren uut Walslant, wonende bi der Seyne overghevoert hadde in Duytslant. Voert hadde Ariovistus, coninck der Duytschen, in sijn heer ende tot sijn hulp die Tryboten, dat sijn die van Straesburch; Nemetes, dat sijn die van Spijers; Vangiones, dat sijn die van Worms; Tulences, dat sijn die van Ments; mit die van Frankenvoert ende meer andere, alsoe datter een sware strijt ghevallen is. Ende een wyl tijts oec die Romeinen, overmits die grote menichte der Duytschen, vervaert waren, mer int einde is Ariovistus voervluchtich gheworden, ende is mit een clein scepken over den Rijn ghevaren; mer sijn twe wiven ende twe dochteren nam Julius ghevanghen, ende volchde theer der Duytschen na, ende versloech se sonder ophouden VI milen weechs lang, soe dat men tgetal van den verslagen niet en weet want si in der menichten ontallick waren.
Auteursrechtelijk beschermd