Zwolsche kroniek van 1520 tot 1526

Ansclach tuschen Campen ende Zsuolle.

Item. Der is twijsth ghevallen tusschen den tween steden voerscr. omtrent Pinxteren Anno xvcxx omme enen toll, dat de van Campen begheerden te hebben van den vremden guederen de hoer water roerden

[p. 6]

dree elle dijepp bij Ens ende wolden, soe men sede, dat de scepe, mit vremden gueden gheladen, solden coemen toe Campen an de welle ende betalen hoeren toll. Waeromme de van Campen hebben een Zsuollss scijpp, mit vremden gueder gheladen, anghehaelt ende beseth ende nemen van de vremde gueder tollen, ende dat Zsuolsche guet voert sonder toll laten varen, mer dit schipp van Zsuoll moste daer bliven hent Sinte Geertruijt. Doe sandet mijn g.h. Philippus mit syn diner Zsuoll, mer de van Zsuoll hebben weder beseth Maes Roeper mit noch meer burgheren ende oeck waghen ende peerden, de tsamen van Pincxteren Zsuoll hebben ghebleven hent sante Jacops avent. Doe toeghen sy hent toe Campen op sulker condicijen verdedinghet van de vyff godshusen ende ridderscap ende steden, dat se dat schypp wederomme solden senden, off sy solden wederomme in Zsuolle coemen in hoer besate; dat sy niet en hebben ghedaen noch dat schip oeck niet ghesant, eert myn g.h. voerscreven sande, ende se hebben hoer ere ende eeth laten staen. Nae der tyt moste nijmant van Campen binnen Zsuolle noch de van Zsuolle daer coemen noch gheen coemenscap of maesscap myt den anderen hebben ghehat. Doe ten lesten hebben sommighen van Campen merct toe Franckusss gheholden, soethet anghebracht wert. Nochtanss sede de wert ende de lude oeck mit hoeren eeth hoeldende, dat het soe niet en wass. Waer wijth de van Campen verbijttert werden ende haelden alle de Zsuolsche besten, de se becoemen konden en doe toeghen de van Zsuolle wijth ende toghen voer Campen mit bussen ende begheerden mitten den van Campen te slaen ende schoeten wall dremaell mitter halven slanghen toe Campen inde

[p. 7]

stath ende nemen oeck mede alle de besten, de daer ommelanks der brugghen ghenghen ende de van Campen schoten doe een schoemaker ende wonden oeck noch enen man. Daerna toghen de van Campen ende branden dat waeckhuss toe Koeten ende boerden de scholde in den gront, mar doe de statt Zsuolle doe de wyth quam, weren sy alle wech. Na der tijt sint de van Campen ghecoemen des middernachtes ende hebben enen ganssen hoep husen ghebrant op den Voerster dyck ende de van Zsuolle hebben se veriacht hen ande stowdijck, daer sy hoer scepen hadden ligghen ende doe verloren wy well ii doeden, soe dat wij malkander groeten schaden deden. Nochtans wij se stercker noech waren, soe is toe Deuenter ghesloeten op sinte Benedictus dach Anno xxi van de ghedeputierden myns g.h. dat een yttelic solde varen sonder toll ende ien yttelic solde syn ansprake ende replicacy ende duplicacy, triplicacy in scryfft gheven, de van Campen eyrst na de van Zsuolle, daer se an beyden tsiden mede wijnnen ende verlisen wolden de gherechticheit des toeells, daer men de sentency van solde gheven by rade ende deputierden des Neder- en Overstichtes van Wttrecht in presenty myns g.h. Philippus van Borgondijen ouer sess weken daernaevolghende. Ende hyer entusschen wert all hemelic ghecommunicijert mitten Geldersschen tot verderffenisse tlants, als men ghenoechsam ghesyen hefft.

Item soe sint ghetoeghen uijth van Zsuolle: Robert van Ittersum ende Albert Wycherinck omme de sentencij te hoeren teghen de van Campen; soe wolde se myns g.h. Philippus hebben op Wijck ende sy bleven bijnnen Wttrecht ende dat mijste deell de gheven de

[p. 8]

sentencij voer onss. Ende myns g.h. Philippus de bereepp de sentencij voer den Keiser, dat daer sulx solde werden gheventiliert ende twelke ghedaen wert hadde wijtrecht anghemerct, omme dat myn g.h. ansacht de verbitterheit der twijer steden ende wolde sulx onder de voeten hebben ghetreden. Ende deden wijthseth eene schattinghe by consent der twijer. Zsuolle stont des teghen vyff oert schylts omme de onlusten an beiden tsiden neder te legghen ende de sentencij van den Keiser weder toe reduciren ende alle dinck in gueden punten te brenghen, welke doe de van Zsuolle behinderden. Mer se hebbent sint well moghen syen, dat men van velen erven well hefft ghegheven xxv olde schilden. Soe sint de van Zsuolle. Nadeen dat se hoer schip weder hadden ende ellic mochte varen waer hij wolde ende ons niet een meer in der hant off ghevanghen wert off een huuss offgebrant wass, dat seer eerlich voer de stath Zsuolle hadde ghewest, ende toghen to den hartoech van Gelder dat de hoer recht solde verdedinghen op sulker menijnghen wes hy in woerve?, solde tot behoeff wesen van sinte Marten, ende ellic solde by lyff ende guet ende ere bliven alse dessen breef inholt de hyrnae volghet: