Zwolsche kroniek van 1520 tot 1526

[p. 1]

Copija der ridderscap ende steden van vrede, anno XXII.

Wy, Herman van Keppell ende Henric van Essen ende voert ghemene ridderscap des landes van Zallant, Reynolt van Coeforden ende Gerrijt van Langen ende voert ghemene ridderschap des lands van Twenthe, ende wy, burgermeisteren, scepenen ende rade der steden Deventer ende Campen, Oldenzaell, Steenwijck, Hasselt, Vollenhoe, doen kont ende bekennen vermitss desen openen breve voer onse ende onssen nacoemelingen: alsoe de doerluchtige hoechgheboren vermogende ffurst ende here, heer Kaerle, hartoech van Gelder ende van Gulick ende Greve van Sutphijn etc. mit ons ende den samenden Aversticht van Uttrecht ende wij mit siner ffursteliker gheneden ter eere Gods almachtich, Maryen synre ghebenedider moder en des hemelschen Heers? durch tusschenspreken gueder fronden al sullic arronghe, twysth ende vede enen titlanc bijs noch tusschen siner g. landen ende den Averstichte van Wttert ghewest, sint eens ghewerden, alsoe dat sine ff. g. mitten Averstichte vorsz. allen ridderscappen, steden, ende sloten, vlecken, landen ende allen anderen ondersaten daer onder ghekoemen nu vort an ene ewijghe soene en vrede sall ende wijll onderhalden, nae vermogen segel ende breven ons wederomme van siner ff. g. gegheven, soe laven ende sekeren wy wederomme voer ons ende dat ghemeene Aversticht, soe dat mit ons desen vreden ende soenen

[p. 2]

sementlic is inghegaen mitten ffursten van Gelder vorscr. ende mit alle siner ff. g. landen ondersaten ende bewanten vrede ende vruntscap tonderhalden; tegens siner ff. g. off siner g. landen ondersaten noch bewanten niet thoe doen off wthen sloeten, steden, ende vlecken dess Auerstichts tlaten geschien in eniger maniren ghedurende den tyt lanc van den leven ons g.h. van Wttrecht nu ter tit off soe lange sijn ff. g. idt bysdom van Wttert besittet, then weer syn ff. g. sick middeler tit mitten ffursten van Gelder verdroget. Ende inghefalle deselve onse g.h. van Wttert daeromme ijtsswes doonde werde, daer toe ende sullen wij mitten Aversticht sinen g. gheen assistentsy doen, off wt onssen steden, sloten, of vlecken laten gheschijen hemelic noch apenbaer. Voert sullen wij riddercap, steden groet ende cleijn, sloeten ende landen van Auerijssell vorsz. ghenen heren van Wttert voort ahn then ewygen dagen accepteren, hy weer ghecoren off gheset in wat maniren dattet wesen mochte, de selve heer van Wttert sal irstens laven ende ghenoechsam sekerheit doen mitten ffursten ende furstdom van Gelder siner g. landen ende bewanten vrede ende eendachdrachticheit sin leven lanc, of dewile sine g. heer van Wttert is, tonderhalden. Ende deselve heer van Wttert sal sich irstens mitten ffursten van Gelder verenigen ende van allen ghebreken to beyden tsieden verdragen, alsoe dat sine gen. des toe vreden sint. Ende off dat verdrach tusschen den beiden ffursten van Gelder ende van Wttert vorsz. niet treffen en wolde, sollen hoer gen. beiden enen ffurste daer toe nemen, waerbij deselve gebreken neder ghelacht ende gheslechtet mogen worden. Oeck is bevoorwart of enige van de ridderscap, kleine steden, sloeten, vlecken off ondersaten desen vrede

[p. 3]

van den Auersticht ende verbonde niet medebegrepen wesen wolden, sullen wij nochtans mitten anderen steden kleyn ende groet, ridderscap, sloeten, husen lande, ende ondersaten, desen vrede ende soene oprechtich sonder in breken onderholden ende den fursten van Gelder mitten onwilligen laten bewaren. Voert an sullen in ende wthemessche then beiden tsiden bijnnen ende buten steden, sloten, ende vlecken met malkanderen mogen kijren, verkiren, conversiren, hoere koepmenscappen ende neringhe thoe water ende thoe lande voer hantiren op ghewonteliken toll ende wechgelt vry, velich ende onghelet, ghelic as dat in tiden des vreden. Voert sall een igelic an beyden tsiden syn guet wederomme ontfangen ende ghebruken mogen, als hy dat nu wynt. Allet vorsz. sonder argllist. Des thoe orkonde ende waerheit, soe hebben wy Herman van Keppel ende Henric van Essen vsz. voer ende mede voer alle de gansse ridderscap en de kleyne steden des landes van Zallant ende Vollenhoe tot hoere sonderlinge begeerten, ende wy Reynolt van Coverden ende Geerijt van Langen voersz. voer ons ende mede voer alle de ander gansse ridderscap, der stat Oldenzaell ende andere kleijne stedekens des landes van Twenthe tot horer allre sunderlinger begeerten, ellic onssen segell ende voert wy burgermeister, scepenen ende raden der stat Deventer onsser stat secreet segel hijer beneden an desen breeff gehangen. Gegheven int jaer ons heren Dusent vifhondert tweentwijntich op den vijerden dach des maents Octobris.