Zeeuwsche Nachtegael en bijgevoegd Tafereel van sinne-mal

Venus bedroch.

Als Phyllis op een tijt quam in de spieghel kijcken,
Om haer ghekrinckelt hayr een weynich op te strijcken;
Siet! Venus, die alsdoen juyst in de camer was,
Die ging haer eygen beelt vertoonen in het glas;
De soete Phyllis gaet haer teere cantjens rechten,
Sy set haer douckje schrap, en kemt haer blonde vlechten,
En mits sy (soose meynt) haer eygen schijnsel sach,
Soo riepse, laes! ick ben nu bruyner als ick plach.