Watapana. Jaargang 3

[p. 25]

Solo

for di un kachu,
suplá fo'i un kabés jen di strea,
mil maribomba a bin
morde mi soño
na skina di anochi

mi n'ta kòrda mas
- ajera a saka su ala fo'i mi sintí -
mi kurasón a bira grandi
i na kabuja di luna
m'a subi purá-purá
shelo a klaba su djente den mi wowo
i solo a traha un nèishi den mi nanishi

webo a haja kaska di bináguer,
simía a bira awa, weso a bira santo,
amor a bira lodo, wantomba a haja plasma,
rosea di metal, kachi-kachi di biento

pero m'a pidí bo, solo?