Watapana. Jaargang 2

[p. 13]

[Gedichten Philomena Wong]

Simpel

Mi ta constata un milagro
E milagro di un amistad,
tan puro y tan sincero,
treciendo simpel felicidad.

Mi ta constata un misterio.
E misterio di un amor,
tan suave y tan humano,
dunando bida mas balor.

Philomena Wong

Reflekshon

Kore mucha, kore!
Kwé e barbuleta!
Piki un flor di mondi!
Kore djis pa kore!
Karisyá un bestya!
Bula ovr' i pyedra!
Subi pal'i mata!
Sapatyá dj'alegria!
Larga splendor di solo
Reflektá riba bo rostro!
Kanta ku bos halto!
Larga mundu sa
Kon felis bo ta!

Philomena Wong

[p. 14]

Motibu

Mi a tene un mucha den mi brasa
i tur desgusto a kita kai.
Tur renkor di mundu
manera un para bula bay.

Un kriatura inosente
a hasimi rekoge
tur momentonan bunita.
A rebiba den mi mente
felisidat ku mi tambe konose.

Mi a sera un mucha den mi brasa.
Batimento di su kurason
a dunami un sintimento straño
pero puro:
amor... di un kriatura,
sin egowisma.

Mi a tene un kriatura na su man.
Su sonrisa ku a ekspresa
profundo di su alma puro
swavemente a karisya
mi kurason
i a hasimi, anke pa un momento
lubida,
difisil ku bida ta!

Den un kriatura chiki'
mi a enkontra un poder
ku hende grandi mes no ta posee

Philomena Wong

[p. 15]

E dragon i e para

Un dragon a bula sali
buskunú,
dyabóliko,
feros!

i a bati
grita
sapatyá!

trose rabu
suta tera
pisa shelu,
reboltyá mundu rondoná
trapa i destrosá!

supla kandela
mula djente
morde, gruña
sker....
naturalesa na filingrana
salta,
lora i dray!

spùyt veneno
pika ku lenga
na dos gesplèyt
yanga kurpa monstruoso
kibra,
ranka i machiká
bida rondoná!

Un para
k'a mira
a salba kurpa
bula bay
laga tras
un monstruo
tur djindjá!

Philomena Wong