Watapana. Jaargang 2

[p. 4]

Muchila, promé kolekshón di Hubert Booi

Poko tempo pasá a sali e promé kolekshón di H. Booi, ku ta karga e título di ‘Muchila’.

Muchila ta un palabra mihó konosí entre e biewnan, ku ta traha den kunuku i tambe serka piskadónan. Ta un sorto di sako pa nan hiba algo di kome adén i tambe algún otro kos más, manera kabuja, liña di piska, kuchú, kalbás pa bebe awa, etc.

Den su ‘Muchila’ Booi a hinka sugestivamente algún poesía, kwenta i tradukshón na Papiamento pa presentá grandi i chikito, pa nan ‘haja un rato di distrakshón i tambe un poko mas apresio pa nos idioma Papyamento’.

Nos tin ku bisa, ku además di e ‘rato di distrakshón’, ora nos a lesa e obra, nos a ripará kón magistralmente nos idioma ta ser uzá i estilisá pa Hubert Booi.

Ta meskós ku un hende, ku, despwés di a laba su auto, ta dun'ele un bon simonáis pa para kontemplá orgujosamente kón solo ta hari i kinipí wowo den splendor dje auto.

Asina, tambe, Booi a sinta skaf i saka enkanto fo'i nos idioma. Loke ta meresé nos atenshón espesial ta e kwenta, ku kwa e buki ta habri: ‘Un pal'i kwihi ta konta su storya’. Tanto pa su fasilidat di lesa, komo pa e kontenido i e forma.

Den un forma ku Godfried Bomans sa uza den su ‘sprookjes’ nan Booi a basha su rekwèrdonan di tempo pasá.

Ta un palu di kwihi ta konta, pero ta más ku klaro, ku dje manera èi e autor ke duna nos un bon konseho, un aviso pa nos no destruí naturalesa di Aruba (kòrtamento di palu).

Através di e storia no ta laga di surgi un nostalgia, un dushi rekwèrdo di témponan pasa. Uno-pa-uno, e palu ta relatá nos su sekrétonan: e ke aliviá su konsenshi i konta nos dje kustúmbernan di tempo biew, promé ku nan bin kòrt'é na pida-pida pa nan traha mésanan di dje.

Booi, na un manera chistoso i agradábel, ta mustra nos e bentáhanan, ku su tempo (o di su antepasádonan?) tabatin riba nos tempo di awó. Kwidadosamente é ta skoge su palabranan i temperá e frásenan pa duna e kwenta un tono alegre i burlante. Pa medio di sierto palabra ku un sonido kómiko o palabra ku é mes a inventá, e autor a logra kishikí nos i saka nos simpatía p'e palu di kwihi. Nos ta haja, asina, e impreshón ku e palu ta un bon kontadó di chiste. Por ehèmpel:

‘Nan (mi reysnan) por ta bòw di tera; pero
nan ta bibo, na tino, no manera hende ku ora bo
hala tera tapa riba dje, ta rèkèmèntinpas’ (pág. 2)

‘....nan ta di awó, pero ami ta di tempo di
kompa-tene-pa-mi-subi’ (pág 3)

‘Solo? Anochi? Ma hòmber, bo kabés ta na
waterpas?’ (pág. 13)

[p. 5]

Ta un téknika konosí, e.o. den obra di Elis Juliana.

Loke, sin duda, tambe ta un mérito di e obra, ta e manera ku Booi ta pone e tenshón krese.

E ta grap nos atenshón, nos interés, i hasi nos ‘kaweta’.

Na página 3, por ehèmpel, e palu di kwihi ta bay konta nos un sekreto. E ta bisa: ‘hala mas aserka, pasobra mi n'kye tampoko, pa e tunanan, ni kadushi sa loke ami sa....’

Nos ta bira anshá pa tende e sekreto, pero e palu di kwihi ta exigí un poko más di nos pasenshi i ta puntra: ‘Boso sa kiko, boso n'ta mira e pyedra ku tin un tiki pabow di mi aki?’

Aki tras nos ta spera e gran palabra: ‘wèl....’ pero e pompadó ta sigui ku: ‘Nò, no esey, esun mas grandi ey. Ey bo ta!’ I despwés numa e palabra ta kay: ‘Wèl, ey bow un papachi byew...’ Pero aínda nos no ta tende e sekreto mes, pasobra e autor (sabí!) a introdusí dos orashón relativo, promé ku e kompletá e orashón prinsipal, pa asina e rèk e tenshón más. ‘Wèl, ey bow un papachi byew, ku tabata yama Peruchi, ku ya a muri hopi tempo kaba, a dera un baul chikito di heru’ (p. 4)

I poko más adilanti e autor ta pone un trampa pa nos:

‘E parti mas interesante di hentér e storya aki lo ta naturalmente ku Shonnan lo kye sa, unda e lugá ta keda ku Peruchi a dera su baul di morokota. Shonnan konosé Makwarima. Sí? Wèl, nèt pariba di kfsflmkost trimpsvf rt, esta laf no, e lèternan a bruha.’ (p. 5)

Esaki no ta nada más ku un sorto di wega di charada. Nos ta keda ku e sensashón di un hende baliá; nan a tene nos pa sokete!

Di e kwéntanan más kòrtiko ‘Diaryo di un studyante’ (fragmento) a kai más na smak, anke ku e sensashón nostálgiko, ku Booi kier a reflehá den e ‘fragmento’ aki, por a logra más perfekshón, si e no tabatá asina rápido i kòrtiko.

Na mitá dje ‘fragmento’ e narador ta bisa:

‘Mi no tabata kye a trasladá mi mente ku mucbu velosidat, pa mi no pèrdè e sensashón dushi....’

Pero sin embargo e ‘velosidat’ un dado momento ta haja un ‘snuk’, ku e sensashón no ta krese gradwalmente of poko-poko. Ban purba aklará loke nos ke men.

‘Ta manera e hal'i kokonan, ku ta bari e shelu kla i blow ku nan zoyamento, ta saludami ku un “bonbini” afektwoso.

....I den poko ratu.... atami dilanti kas.... tur kos a keda meskos.... e mesun transhe.... e mesun trinitarya, ku awó ta tur na flor kòrá manera ku e kye dòrna su mes pa spera un bishita.... Porta di kas ta habrí...’ (p. 36)

Un deskripshón, por sierto, bon i bunita. E frásenan kòrtiko, ku poko punto nan tras, ta sugerí un lentitut di pensamento, rekwèrdonan ku poko-poko ta bòltu bin ariba i ta haya klaridat den memorya dje autor. E ‘snuk’ (mental) ta tuma lugá exaktamente entre e promé frase (‘Ta manera.... afektwoso’.) i e siguiente kòrtá (‘....I den poko ratu.... atami dilanti kas) E paso aki ta rápido, di gòlpi.

[p. 6]

Ja nos a kuminsá bai soño dor di e zojamento di pal'i kokonan, i ata e autor ta sakudí nos ku palabranan manera: ‘den poko ratu’ o ‘atami....’

Lástima, pasobra ta na final é kier a lanta nos fo'i soño.

‘Mi kye hala mas aserka... pero nèt e momento ey, mi ta tende un batimentu duru na porta, nan ta yamami...’ (p. 37)

Un di e poémanan mihó lográ den ‘Muchila’ ta, según nos, ‘Si mi por...’ (mira más adilanti na página 8)

E idea di ke drecha mundo i logra un bida mihó (un tema basta transparente den obra di Hubert Booi) a kristalisá aki den poko palabra sensijo i masha natural.

No tin nada den e poema aki ku por ta un indikashón falso di artifisialidat o ‘ko'i pikete’.

Tin hende ku ta kere más balor un komposishón poétiko ta haja, ora nan jen'é ku rima, rima i más rima....

Esei ta baratijo, kos di tempo biew!

Nan ta lubidá ku sin rima tambe nos por penetrá den nos sintimento, den esensha di poesía. Ta klaro, ku rima por duna un komposishón más balor musikal. Nos por experimentá, lesando e vérsonan, un ola o más ola di músika, ora e palabranan ta rima. I esaki, hunto ku e ritmo dje vérsonan, ta loke a kontribuí na perfekshón di e poema ‘Si mi por....’ Nota kón e rimanan den e poema akí no ta tuma un lugá dominante, nan no ta rekargá e poema ni dun'ele un tono ridíkulo.

Ta pasobra nan ta bon lokalisá, bon skondí den ‘interior’ di e vérsonan. Of den otro palabra, nan no ta poni na final di kada pòwsa (sesura), sino mèimèi dje frásenan, ku exepshón di e deláster dos vérsonan. Ta meskós ku e palábranan ta rima pa mero kaswalidat.

E lektura fásil (vérsonan kòrtiko), e musikalidat i e sensijés di palabra, indudablemente, a pone e poema akí logra su perfekshón i but'ele habri manera un rosa, den su bejesa natural di tur día....

E poema, ku ta sigui nèt tras di ‘Si mi por....’, pa loke ta toka su balor poétiko, ta ‘E último Karibe’.

Ta un poema, ku pa su tema, ta pertenesé na un konhunto di literatura indianista, ku ta existí na henter Amérika Latina, fo'i Argentina te Méxiko.

Nos por bisa, trankil, ku e ta e úniko den su género na nos idioma, o más konkretamente na Aruba, ja ku na Korsow no ta existí e género ei (indianismo).

Den e poema akí Booi ta presentá nos un indján, un rebelde, un guerero, ku no kle bai sirbi komo katibu na otro lugánan.

Un tipo, pwes, enteramente otro ku Lauffer a pinta nos den su poema ‘Keho di katibu’. (Kumbu)

Booi, den su poema, ta destaká e elemento épiko, mientras Lauffer a kwaha lirismo den di dje.

Den su afán romántiko Booi a buska un nota original pa Aruba (kolor lokal) i asina el a jega na identifiká su mes ku un indján: ‘e último Karibe’.

[p. 7]

Esnan ku kie hasi e opservashón, ku na Aruba nunka no tabatin Karibe, sino Caiquetío, nos lo ke duna un kalmante; no ta nos intenshón di aserka e poema aki fo'i un punto di bista istóriko, sino simplemente estétiko.

Nos ta nota, ku loke e poeta kier a hasi ta expresá un profundo sintimento di nashonalismo. Den un ambiente kolonial, ora hende ta trata di buska nan mes identidat, sémper nan ta drèi buska un nota típiko dje país, un elemento ku ta mara nan ku nan tera. Den e sirkunstansha akí Booi a sintié sikológikamente mará ku héndenan, ku ja a muri bai pa sémper, pero ku tabatá forma e promé abitántenan dje lugá.

I pa expresá asina su ‘nashonalismo’ e poeta a hasi uso di un rekurso masha frekwente den ‘Romantisismo’ na Latino-Amérika: identifikashón ku un indján. Kón e poeta a pinta nos su protagonista?

Manera un hòmber atlétiko, balente, revolushonario i.... jen di idealismo.

E verso: ‘Ku huña den mi karni, m'a lucha, bringa duru’ tin un forsa, por sierto, masha expresivo i é ta e verso, kisás, di más poétiko den henter e poema.

E struktura formal di e poema ta lo siguiente. E poema ta konsistí di 6 estrofa; kada un tin 4 alehandrino. Den e promé kwáter estrófanan nos ta ten de stèm di e indján, ku ta desahogá su mes, promé ku nan mat'é. Su stèm ta kulminá den un grito: ‘Ligami!’

Ku verso 16 (‘Awe ta boso dia, mayán nos ta mentá’) e poeta ta sugerí e deláster palábranan di su protagonista.

Despwés, den e dos último estrófanan, ta meskós ku e poeta mes ta tuma palabra, pa basha su tema den un sorto di epílogo: e nòmber ‘Karibe’ a keda inmortal!

Atrobe nos ta nota Booi su dominashón di músika.

E promé verso só tin un iregularidat, esta, en bes di tin asento riba di dos, di kwáter i di sèis sílaba di kada hemistikio (kada verso tin dos hemistikio di 7 sílaba), su aséntonan ta kai riba di promé, di kwáter, i di sèis sílaba. Pero esaki no ta ningún estorbo, al kontrario, asina e palabra ‘ami’ ta haja más énfasis i ta destaká kontra e resto di e vérsonan regular.

Nos ke terminá e ensajo akí i expresá nos deseo, ku Hubert Booi lo kie sigui dediká su esfwèrso na kreashón i kultivashón di nos propio literatura, pa asina nos héndenan sigui haja más ‘rato di distrakshón i tambe un poko más apresio pa nos idioma Papiamento’.

Ta más ku klaro, ku e despresio ku algún tabatin o tin aínda pa nos lenga, ta ko'i hende bobo, ku poko-poko ta bai pertenesé na un pasado o, manera e palu di kwihi lo bisa: ‘Un tempo di KOMPA-TENE-PA-MI-SUBI....’

Pasobra ja nos ta drentando un époka más modèrno: époka di nos mes identidat!

I Dios sa, ku nos mes lo n'ta presente ariba e día, ku, despwés di un kambio di mentalidat, no pweblo lo haja su konsiensia nashonal, ku Papiamento, t'ei pas nos uz'ele den tur su rekúrsonan expresivo i ku nos literatura no ta ‘ko'i artista’ só, sino propiedat espiritwal di nos lenga, ku nos tur mester konosé i stima.

H. Habibe.