Watapana. Jaargang 1

[p. 16]

Ju di tera

pa O.D. Habibe

Lamán a lanta, subi, sapatiá
riba Tera, jena su kurpa ku ansha,
laga su weso di lomba ta krak,
trose, preta i skupi den su baranka.

Nwebe luna den anochi kolgá
a lombra Tera jen-jen di speransa,
ora un doló i terror di tempestad
a bin buta morto krese den su alma.

Biento skèrpi a brota fo'i orkán,
kuminsá ranka tur blachi di mata,
kore bai manera un loko nan tras,
trompiká, lanta para i bolbe ranka.

Awasero, ku karbachi den man,
a kore subi un sero, baha, drama,
pone wantomba ku lomba doblá
na kareda tra'i Tera su santana.

Un lámper a bula sker, rementá
skochi di Tera, ku su alma na flama,
i mané un morto ta kibra su graf
m'a preta sali fo'i Tera su entraña.

Henry Habibe

9 februari 1967

[p. 17]