De oudnederlandse (oudnederfrankische) psalmenfragmenten

[p. 22]

Tekst¹⁾

Psalm XVIII
(Hebr. XIX)

Himila tellunt guolikhêide godes, inde uuerk hando sînro furkundit festi.
Dag dages ûtropizot uuort, in naht nahti cundit uuîsduom.
Ne sint sprâken noh uuort thero ne uuerthin gihôrda stemmen iro.
An allero erthon fuor lût iro, inde an endon ringis erthon uuort iro.
An sunnun satta selitha sîna in he also brûdegomo forthgangande fan bettekameren sînro.
Mendida also uurisil te lôuponi uueh, fan hôon himili ûtganc sîn.
In uuithirlôp sîn untes te hôi sînro; nohne ist the sig geberge fan hitte sînro.
Êuua godes unbeuullan, bekêrundi sêlun, urkuntscap godes getrûuui, uuîsduom farlîendi luzzilon.
Rehnussi godes rehta, geblîthande herta, gebot godes scîeri, irliohtende ôgun.
Forhta druftines hêilig, uoluuonende an uuerildi uuerildis; duoma druftines giuuâri, rehtlika an sig seluon.
Begerlika ouir golt in stêin dûrlikin uilo, in suottera ouer honog in râta.
Geuuisso scalc thîn behuodit sia, an behuodene im uuithirlôn mikil.

1) Tussen haakjes geplaatste woorden komen niet in het hs. voor.

[p. 23]

13.

Misdâdi uuie uirnimit? Fan beholenen mînin gerêini mi in fan fremethon ginâthe scalke thînin.

14.

Of sie mîn ne uuerthon geuueldig, than ik unbeuullan uuesen sal uan misdâdi mêistero.

15.

In uuesan solon that gelîcun sulun sprâken mundis mînis, in gehugenisse hertin mînis an gegenuuirdi thînro emiceio.

16.

Hêrro, hulpere mîn inde relôsere mîn.