De Vorsterman Bijbel

§ Dat .xxij. Capittel.

1

⁺ENde heeft mi getoont een schone vloet des leuende waters, blinckende als een Cristal, wt comende van die stoel gods ende des lams.

+ A

2

Int middel van haer straet, ende aen beyde siden des vloets stontet hout des leuens, twalef vruchten brengende, alle maents zijn vrucht geuende, ende den bladeren des houts tot gesontheyt der heydenen. ⁺

+ Esaie. lx.b

3

Ende alle vermalendidinge en sal niet meer wesen. mer dye stoel gods ende des lams sullen daer in wesen, ende zijn knechten sullen hem dienen.

4

Ende sullen zijn aensicht sien, ende zijnen naem sal wesen in haer voorhoofden.

5

Ende de nacht en salder niet meer wesen, ende si en sullen gheen licht behoeuen des lichters, noch tlicht des sons, want die heere God sal haer verlichten, ende si sullen regneren van eewicheyt tot eewicheyt.

6

⁺Ende hi seyt mi. Dese woorden zijn getrou, ende warachtich: ende God de here der heyligen propheten heeft sinen engel gesonden te thoonen sinen knechten datter gheringe geschien moet.

+ B

7

Ende siet, ic coem haestelic. Salich, dye daer bewaert die woorden des prophecie van dyt boec.

8

Ende ic Ioannes, die dit gehoort ende gesien hebbe. Ende nae dat ict gehoort ende gesien hadde, so hebbe ic geuallen, op dat ic aenbidden soude voor die voeten des engels, die my dit thoonde.

9

Ende hi seyde mi. Siet, dat ghijt niet en doet. Want ic ben v mede knecht, ende een van uwen broederen der propheten, ende der ghenen die daer houden dye woorden des prophecie van dit boeck. Bidt God aen.

10

⁺Ende hi seyt mi. En teykent niet die woorden des prophecien van dit boec. Want die tijt is naby.

+ C

11

Die daer scadet, die scade noch, ende die in vuylheden is, die werde noch vuylder, ende die rechtuerdich is, die werde noch meer rechtuerdich, ende die heylich is, werde noch meer heylich.

12

Siet, ic come geringe, ende mijn loon is met mi eenen yegeliken weder te geuen na zijn wercken.

13

Ick ben Alpha ende O: tbeghinsel ende teynde, deerste ende tlaeste.

14

Salich die haer cleederen wasschen in tbloet des lams, op dat haer macht si int houdt des leuens: ende doer [kolom] die poorten ingaen in dye stadt.

15

Mer buyten zijn dye honden ende touenaers, ende oncuysche, ende dootslagers, ende der afgoden dienaers, ende alle die de logen lief heeft, ende doet.

16

⁺Ic Iesus heb minen Engel gesonden dat hi v dit getuygen soude in die kercken. Ic ben die wortel ende tgeslacht van Dauid, ende een clare blinckende morgensterre.

+ D

17

Ende die geest ende die bruyt seggen: coemt. Ende die daer hoort die segge coemt Ende die daer dorstet, die come, ende die wil, die neme twater des leuens om niet.

18

Want ick betuyge alle die daer hoort die woorden des Prophecie van dit boeck. Ist datter yemant daer toe settet tot desen, so sal God toe setten op hem die plagen die in dit boeck gescreuen zijn

19

Ende ist datter yemant vermindert vant dye woorden der Prophecie van desen boec. God sal af halen zijn deel wtet boeck des leuens: ende van die heylige stadt, ende van tghene dat in dit boeck ghescreuen is.

20

Hy seyt: die getuych geuet van desen. Certeyn ick come geringe. Amen. Coemt Heer Iesu.

21

Die gracie ons heren. Iesu Christi si met v allen. Amen.

§ Hier is voleynt dat gheheel Nieuwe Testament.

§ Gheprint Thantwerpen in die Cammerstrate, inden gulden Eenhoren, Bi mi Willem Vorsterman, Voleynt int iaer na dye gebuerte ons salichmakers .M.CCCCC. ende .XXXI. Den xx. dach van Iunio.

[afbeelding]