De Vorsterman Bijbel

§ Dat .xi. Capittel.

1

⁺ENde mi is gegeuen een riet, als een roede, ende daer is mi geseyt. Staet op, ende meet gods tempel ende toutaer, ende die daer in biddende zijn.

+ A

2

Ende die sael die buyten is, werpt die wech, ende meet dat niet, want het is gegeuen den heydenen, ende si sullen .xlij. maenden die heylige stede vertreden,

3

ende ic salse mijn twee tuygen geuen, ende si sullen propheteren, dusent twee hondert ende tsestich dagen, gecleet wesende met sacken.

4

Dit zijn twee olijfboomen, ende twee candelaren, staende in tegenwoordicheyt des Heeren der aerden.

5

Ende ist dat haer yemant wil hinderlick wesen, so gaetter vier wt haren mont, ende verslint al haer vyanden. Ende ist datter yemant haer wil quetsen, so moet hy worden doot geslagen.

6

Dese hebben macht den hemel te sluyten, dattet niet en regent in die dagen haerder prophecien, ende hebben macht op die wateren, om haer te verwandelen in bloet, ende die aerde te slaen met alle plagen also dick als si willen.

[p. R3r]

7

ENde wanneer datse haer getuychnis hebben gheeynt, dat dier, twelck wt die afgront opstigende is, sal maken een oorloge tegen haer ende sal haer verwinnen, ende sal haer doot slaen.

8

Ende haer lichamen sullen op die straten des grote stadts leggen, welcke gheestelic wort ghenoemt Sodoma ende Egyptus, waer ooc haer heer gecruyst is.

9

Ende vanden geslachten, ende volc ende talen ende heydenen sullen die lichamen sien, door drie daghen ende een half, ende en sullent niet toelaten, dat haer lichamen sullen worden in grauen geleyt.

10

Ende die opter aerden zijn woonende, sullen haer verbliden van haer ende sullen vrolic wesen, ende sullen malcander gauen senden, want dese twee propheten hebben hare last aengedaen die opte aerde zijn wonende.

11

⁺Ende na drie dagen ende een half, die gheest des leuens heeft van god in haer ingegaen. Ende si hebben op haren voeten gestaen, ende op haer is grote vrees geuallen, die haer hebben gesien.

+ C

12

Ende si hebben vanden hemel een groot geluyt gehoort, haer segghende. Climt op herwaerts. Ende si zijn inden hemel opgeclommen in een wolc, ende haer vyanden hebben haer gesien.

13

Ende in die vre isser een grote aertbeuinge geschiet, ende tiende deel des stadts is gheuallen. Ende in die aertbeuinge zijnder doot geslagen namen van seuen dusent menschen, ende dander zijn veruaert geworden, ende hebben god des hemels glorie gegeuen.

14

De anderde wee is wech ghegaen, ende siet, die derde wee sal gheringe comen.

15

⁺Ende de seuende engel heeft die basuyn geblasenen, ende inden hemel zijnder grote stemmen geschiet, seggende. Dat rijck deser werelt is geworden ons heren, ende sinen christo, ende hi sal regneren van eewicheyt tot eewicheyt Amen.

+ D

16

Ende die .xxiiij. ouders, welcke in haer stoelen sitten in gods tegenwoordicheyt, zijn in haer aensicht geuallen, ende hebben god aengebeden

17

seggende. O heere onse god almachtich, wij dancken v, die ghene die is, ende die was, ende die sal comen, want ghy hebt v grote macht ontfangen, ende ghi hebt geregneert.

18

Ende dye heyden zijn vertorent geweest, ende v gramscap is gecomen inde tijt der dooden, op datse mogen worden verordeelt, ende geuen loon den propheten v knechten ende heyligen, ende die vreesende zijn uwen naem, cleyn ende groot, ende te bederuen die ghene die de aerde verderuen.

19

Ende inden hemel is die tempel gods open gedaen, ende in zijn tempel is de arck zijns testaments gesien, ende blixemen, ende stemmen, donreslagen, aertbeuingen, ende groten hagel isser geschiet.