De Vorsterman Bijbel

§ Dat .x. Capittel.

1

⁺ENde ic heb een ander stercken engel vanden hemel sien neder dalende, gecleet wesende met een wolck, ende eenen regenbooch op zijn hooft. Ende zijn aensicht was als dye son, ende zijn voeten als vierige pilaernen.

+ A

2

Ende een boexken op gedaen had hi in zijn handt, ende zijn rechter voet heeft hi op die zee ghesedt, mer die lufter opter aerden,

3

ende heeft met luyder stemmen geroepen, gheliken als een leeu, wanneer hi briest. Ende wanneer hi geroepen had, so hebben der seuen donderslaghen haer stem ghegeuen.

4

Ende wanneer die seuen don-[kolom]derslagen haer stemme gegeuen hadden, ⁺ so soude ic scriuen, ende ic heb tot mi een stem horen spreken vanden hemel, teykent wat die seuen donreslagen hebben gesproken, ende en scrijft die niet.

+ B

5

Ende die engel, welcke ic opter zee heb sien staen ende opter aerden, heeft zijn handt totten hemel gebuert,

6

ende heeft door den leuenden van eewicheyt tot eewicheyt ghesworen, ⁺ welcke heeft den hemel gescapen, ende datter in is, ende die aerde, ende datter in is, ende die zee, ende datter in is. Voort aen en salder gheen tijt wesen.

+ C

7

Maer in die daghen des stems vanden seuenden enghel, wanneer hi sal beghinnen die basuyn te blasen, so sal gods verholentheyt worden veruult, als hy door zijn knechten die propheten vercondicht heeft.

8

Ende ic heb een stem vanden hemel gehoort, weder met mi sprekende, ende seggende. Gaet ende neemt dat boexken, ⁺ datter open gedaen is, vander hant des engels, staende opter zee ende opter aerden.

+ D

9

Ende ic heb gegaen totten engel, seggende hem, dat hi tboec soude mi geuen. Ende hi heeft mi geseit. Neemtet boec, ende verslintet, ende het sal v buyc bitter maken, maer in uwen mont salt soet wesen als honich.

10

Ende ic heb tboexken wten engels hant genomen ende ic hebt verslonnen, ende het was in minen mont soet, als honich. Ende wanneer ict verslonnen hadde, so is minen buyck bitter geworden,

11

ende hi seyde mi. Ghi moet weder propheteren in die heydenen, ende talen, ende volck ende veel coningen.