De Vorsterman Bijbel

Dat .viij. Cap.

1

⁺ENde wanneer dat hy die seuende segel had op gedaen inden hemel ontrent een half vre is een stilheit geworden,

+ A

2

ende in gods tegenwoordicheyt sach ick seuen Engelen staen, ende seuen basuynen zijn haer gegeuen.

3

Ende een ander engel is gecomen, ende heeft voor den outaer gestaen, hebbende een gouden wieroocs vadt, ende veel datmen branden soude is hem gegeuen, om dat hi soude geuen die biddinge van alle heylighen op den gouden outaer, welcke voor den stoel gods is.

4

⁺Ende den roock van datter verbrant was is geclommen vander gebeden der heyligen voor god, wt die handt des engels.

+ B

5

Ende die enghel heeft dat gouden wieroocs vat genomen, ende heeft dat veruult van tvier des outaers, ende heeftet opter aerden geworpen, ende donderslaghen zijnder gheschiet, ende stemmen, ende blixemen, ende groote aertbeuinghe.

6

Ende die seuen engelen, welcke seuen basuynen hadden, hebben haer bereyt om die basuyn te blasen.

7

⁺Ende de eerste engel heeft de basuyn geblasen, ende daer is geschiet een haghel ende vier, gemenget wesende met bloet, ende het is gesonden inder aerden, ende tderde deel des aerde is verbrant gheweest, ende tderde deel der boomen is verbrant gheweest, ende alle groen hoy is verbrant geweest.

+ C

8

Ende dye anderde engel heeft den basuyn geblasen, ende als eenen grooten berch vant vier bernende is in dye zee geworpen. Ende tderde deel des zees is al bloet geworden,

9

ende tderde deel vanden creaturen die leuen hadden, ⁺ is inder zee vergaen, ende tderde deel vanden schepen is te niet gegaen.

+ D

10

Ende die derde Engel heeft den basuyn geblasen, ende een groote bernende sterre, als een toorts heeft vanden hemel geuallen int derde deel der vloeden, ende inden fonteynen [kolom] der wateren,

11

ende die sterre wort genoemt Alsen, ende tderde deel is Alsen geworden, ende veel menschen zijnder vande wateren gestoruen, wantse bitter waren geworden.

12

Ende die vierde Enghel heeft den basuyn gheblasen, ende tderde deel des sons is geslaghen, ende tderden deel des maens, ende tderde deel vanden sterren. Alsoo dat dat derden deel van die dinghen worden verduystert, ende tderde deel des daechs en was niet licht, ende dye nacht des gelijcs.

13

Ende ic hebbe gesien ende gehoort een stemme van eenen aren, vlieghende doort middel des hemels, met luyder stemmen, seggende. Wee, wee, wee, den ghenen die inder aerden zijn woonende, van die ander stemme der drie Engelen, welcke noch den blasuyn blasen sullen.