De Vorsterman Bijbel

[p. Q5r]

[kolom]

Hier begint die Epistel die de heylige Apostel sinte Iudas Thadeus gescreuen heeft.

1

⁺IVdas knecht Ihesu Christi, broeder van Iacobus, den ghenen die in God den vader geheylicht zijn, ende in Iesu Christo behouden zijn, den gheroepenen:

+ A

2

barmherticheyt, vrede, ende liefte moet v vermeerdert worden.

3

Alder liefste, als ick alle neersticheyt heb gedaen tot v te scriuen van de ghemeen salicheyt, so ben ick gedwongen tot v te scriuen, biddende dat ghy met uwen arbeyden helpt den geloof dat den heyligen eens gegeuen is. ⁺

+ i.Petri. ij.

4

Want daer zijn somige godlose menschen heymelick in gecomen: die te voren bescreuen waren tot dat ordeel, die onser gods gracie ouerbrengen tot oncuysheyt. Ende God die alleen die heer is, ende onsen Heere Iesum Christum versaken si.

5

⁺Ende ick wil v vermanen, als dat ghi dat eens weet, dat die heer na dat hy tvolck wt Egypten behouden hadde, soe heeft hy weder om den ghenen dye nyet en gheloofden verdoruen.

+ B

6

Ende dat de engelen dye haer oerspronck niet behouden en hadden, ⁺ maer verliet haer huysinge heuet hy behouden tottet ordeel, van dien groten dach met eewighen banden onder die duysternis.

+ i.Petri. ij.

7

⁺Geliken Sodoma ende Gomorra, ende de omliggende steden, welcke in geliker manieren met haer oncuysheyt besmet waren, ende hebben na geuolcht tvreemde vleesch, ende zijn een

+ C

[p. Q5v]

exempel voorgesedt, vant eewige vuer pijn lidende:

8

ende des gelijcs dese besmetten haer vleesch, ende die heerscappien verachten si: tegen die in ouerheit gestelt zijn blasphemeren si.

9

⁺Michael de opperste engel: ⁺ doen hi tegen den duyuel twistende disputeerde vant lichaem Moysi, en dorst toordeel des blasphemijs hem niet op leggen, mer hy seyde: die heer moet v gebieden.

+ D

+ i.Petri. ij.

10

Mer dese dat si niet en kennen dat blasphemeren si, ende dat si natuerlic als onredelike dieren weten, daer in worden si verdoruen.

11

Wee haer: ⁺ si zijn den wech van Cain ingegaen ende metten bedroch des loons daer Balaam doer bedrogen is geweest zijn si wtgestort, ende zijn wech gegaen in die tegensprekinge van Core.

+ Genesis. iiij. Nume. xxiiij

12

Dese zijn in haer brasserien de onreynicheit ende si brassen wel sonder sorge, ende weyden hen seluen, wolken sonder water: die vanden winden omgewaeit worden: bomen inden oext verdorrende: onuruchtbaer, verstoruen, ende wtgeroeyt:

13

wilde goluen des zees: haer eygen scanden wt scuymende, dwalende sterren, den welcken die scemeringe des duysternis inder eewicheyt gehouden is.

14

Enoch de seuende van Adam heeft van dese te voeren gepropheteert, seggende. ⁺ Siet, die heer is gecomen in zijn heylige duysenden,

+ E

15

om dat hi ordeel doen soude tegen alle, ende straffen alle godlose van al haer wercken, die si ongoddienstelic bedreuen hebben, ende van alle herde dingen, die de ongoddienstige sondaren teghen god gesproken hebben.

16

Dese zijn murmureerders: clagers na haer begeerlicheden wandelende, ende haren mont spreket houerdicheyt, verwonderende den personagien om profijts wille.

17

Ghy alderliefste, weest gedachtich der woorden die voormaels gheseyt zijn vanden Apostelen ons heren Iesu Christi:

18

die v seyden datter inde laetste tijt bespotters sullen comen, die na haer ongoddienstige begeerlicheden wandelen.

19

Dit zijnse die verscheydinge maken, sinneliken den geest hebben.

20

⁺Mer ghi alderliefste, v seluen op onsen alder heylichsten geloof timmerende, doer den heyligen geest biddende,

+ F

21

behoudet malcander inde liefte gods, verwachtende die barmherticheit ons heren Iesu Christi, tottet eewige leuen

22

Ende dese bestraft als geordeelde, ende die behoudt,

23

haer nemende wten vuer, den anderen zijt barmhertich in vreesen, hatende den beulecten rock die vleeschelic is.

24

Mer dye daer machtich is te behoeden sonder sonde, ende te stellen voor dat aensicht zijnder glorien onbeulect in blijschappen totter toecoemst ons Heeren Iesu Christi.

25

Alleen gode onse salichmaker, doer Iesum Christum onsen Heere [kolom] glorie, ende grootmakinge, rijckdom ende mogentheyt voor alle werelden, ende nv, ende inder eewicheyt. Amen.

§ Hier eyndet Sinte Iudas Thadeus Epistele.