De Vorsterman Bijbel

§ Dat .ij. Capittel.

1

⁺MIne kinderkens, dit scriue ic v, op dat ghi niet en sondicht. Ende ist datter yemant gesondicht heeft, so hebben wi een voorspraker by den vader Iesum christum den rechtuerdigen. ⁺

+ A

+ Rom. v

2

Ende hi is dye versoeninge voor onse sonden, ende niet voor onse alleen, mer ooc voor alle des werelts.

3

Ende daer door weten wi, dat wi hem ghekent hebben, ist dat wi zijn geboden onderhouden.

4

Dye daer seyt, dat hy god kent, ende en onderhout sine gheboden niet, dye is logenachtich, ende in hem en is die waerheyt niet.

5

Maer die zijn woordt onderhout, voorwaer, dye waerheyt Gods is in hem volmaect. Daer door weten wi, dat wi in hem zijn.

6

Die daer seyt, dat hy in Christo blijft, dye behoort self ooc te wandelen, ghelijc hy gewandelt heeft.

7

⁺Alder liefste, ic scriue v niet een nyeu gebot, mer een out gebot, twelck ghy van beginsel gehadt hebt, ⁺ ende dat out gebot is twoort dat ghi gehoort hebt.

+ B

+ Io. xiij.g

8

Weder om scriue ic v een nyeu gebodt, dwelcke warachtich is in hem, dat selue is oock warachtich in v, want die duysternissen zijn voor by ghegaen, ende twarachtige licht lichtet nv. *

9

Die seyt dat hi int licht is, ende benidet sinen broeder, die is tot noch toe in duysternissen

10

Die sinen broeder lief heeft, die blijft int licht ende scandalisacie en is in hem niet.

11

Mer dye zijn [kolom] broeder hatet, ⁺ die is in duysternisse, ende hi wandelt in duysternisse, ende hy en weet niet waer dat hi gaet, want de duysternissen hebben zijn oogen verblint.

+ Leui. ix.c ende .iij.c

12

⁺Ic scriue v kinderkens, dat dye sonden v vergeuen worden om sinen naem.

+ C

13

Ick scriue v vaders, want ghi hem ghekent hebt, die van beghinsel is. Ick scriue v iongelingen, want ghi den quaden verwonnen hebt

14

Ick scriue v kinderen, want ghy den vader bekent hebt. Ick scriue v vaders, want ghi ghekent hebt die vant beghinsel is. Ick heb v ghescreuen ionghelingen, want ghi sterck zijt, ende twoort Gods blijft in v, ende ghy hebt den quaden verwonnen.

15

En wilt die werelt nyet beminnen, noch tgheen dat in die werelt is. Ist dat yemant die werelt lief heeft, dye liefte des vaders en is in hem niet.

16

Want al dat in die werelt is is begeerlicheyt des vleeschs, ende begeerlicheyt der oogen, ende hoochmoedicheyt des leuens, welcke niet en is wt den vader, maer wt de werelt.

17

Ende de werelt vergaet, ende haer begeerlicheit, mer die den wille gods doet, blijft inder eewicheyt.

18

Kinderen, het is die laetste vre, ende gelijc ghy ghehoort hebt, dat Antechrist coemt, maer nv zijnder veel Antechristen gheworden, waer wt wi weten, dattet die laetste vre is.

19

Si zijn wt ons ghecomen, maer si en waren wt ons niet, want hadden si wt ons gheweest, si souden sekerlick by ons ghebleuen hebben. Maer op dat si openbaer souden worden, dat si niet alle wt ons en zijn.

20

⁺Maer ghi hebt die saluinge van dien heylich, ende ghi wetet alle.

+ D

21

Ick en heb v niet ghescreuen, als die de waerheyt niet en weten, mer als diese weten. Ende dat alle logen niet en is wt de waerheyt.

22

Wie isser logenachtich, dan die gheen die versaect dat Iesus is christus? Dese is antechristus, die den vader ende den soon versaect.

23

So wie den soon versaect, dese en heeft ooc den vader niet. Die den soon belijt, die heeft den vader.

24

Daer om, dat ghi van tbeginsel gehoort hebt, latet in v blijuen. Ist dattet in v bliuet, dat ghi van beginsel gehoort hebt so sult ghi ooc inden sone ende vader bliuen.

25

Ende dit is dye beloftenis, welcke hy selue ons belooft heeft, teewige leuen.

26

Dit heb ic v gescreuen vanden ghenen dye v verleyden.

27

Ende de saluinge die ghy van hem ontfanghen hebt, blijft in v. Ende ghi en hebt niet van node, dat v yemant leere, mer geliken de saluinge self v van als leert, ende tis warachtich, ende ten is gheen logen. Ende geliken si v

[p. Q4r]

gheleert heeft, blijft daer in.

28

Ende nv kinderkens blijft daer in, op dat wy betrouwen hebben, als hy openbaren sal, ende niet bescaemt en worden van hem in zijn toecoemst.

29

Weet ghi dat hi rechtuerdich is, so weet dat alle die rechtuerdicheyt doet, die is wt hem geboren.