De Vorsterman Bijbel

§ Dat .iij. Capittel.

1

⁺MIne broeders, en wylt nyet veel meesters worden, wetende dat ghi groter oordeel aen neemt. ⁺

+ A

+ Mat. xiij.

2

In veel vallen wy allegader. Ist dat yemant niet en valt int woort: dese is een volmact man. Want hi mach zijn heel lichaem met een breydel regeeren.

3

Ist dat wi leggen den peerden tomen inden mont op dat si ons onderdanich zijn, ende wi om stueren theel lichaem.

4

Ende siet, die schepen, al zijnse groot, ende worden gedreuen vanden strangen winde, worden om ghestuert van een cleyn roeder, daert die cracht des regeerders hebben wilt.

5

Also oock dye tonghe is een cleyn lidt, ende vernielt grote dingen. ⁺ Siet, wat groter bosch ontsteect een cleyn vyer,

+ B

6

ende dye tonge is tvier die geheelicheyt des boosheyts Also woort die tonge in onse leden geset, dye welcke beulect tgeheele lichaem, ende ontsteket rat ons gheboerten, ende wort onsteken van die helle.

7

Want alle natuere van wilde beesten, ende voghelen, ende serpenten, ende anderen wort ghetempt, ende is ghetempt van die menschelijcke natuere,

8

maer nyemant der menschen mach temmen die tonghe onrustelick quaet, ende vol doodelick venijns.

9

Doer huer gebenedien wi god ende den vader, ende doer haer vermaledijen wi die menschen, welcke geschapen zijn nae dat beelt ende gelijckenisse Gods.

10

Wt dye selue mont comet voort dye gebenedijnge ende vermaledijnge. Mijn broeders, dit en moet aldus niet wesen.

11

En mach niet een fonteyn, wt een conduyt wt vloyen soet ende bitter water?

12

Mijne broeders, mach een vijgebom oliuen, oft een wijngaert vigen voort brengen? Soe en mach gheen fonteyne soet ende sout water voort brengen.

13

⁺Wie isser onder v wijs, ende met wetenschap begaeft? die bewijse wt zijn goede conuersacie met sachtmoedicheyt des wijsheyts, zijn wercken.

+ C

14

Ist dat ghi hebt eenige bitter achteruolginge ende tweedracht in v hert: en wilt niet glorieren, ende logenachtich wesen teghen dye waerheyt,

15

want dese wijsheyt en is niet neder dalende van bouen, vanden vader des lichts, mer is aertsche vleeschelike ende duuelsche.

16

Want waer achteruolghinge ende tweedracht is, daer is onstantachticheyt

[p. P8r]

ende alle boos werck.

17

Die wijsheyt dye van bouen is, inden eersten is si suyuer, daer na vreedsamich, seechlic, radelick, goetwillich vol met barmherticheyt, ende goede vruchten, oordeelende, sonder beueynstheyt.

18

Die vrucht des rechtuaerdicheyts wort in vrede ghesayt, dye vrede makende zijn.