De Vorsterman Bijbel

§ Dat .xxij. Capittel.

[p. P3r]

1

⁺GHi mannen, broeders, ende vaders, hoort mijn reden dye ick nv doe tot v.

+ A

2

Als si hoorden dat hy haer met Hebreeuscher talen sprack, so worden si noch stilder. Ende hy seyde,

3

ick ben een Ioetsch man geboren tot Tarsen in Cilicien, ende op gheuoedt in deser stadt voor die voeten van Gamaliel, gheleert naeder waerheyt des vaderlijcken wets, een vierich lief hebber des wets, ghelikerwijs als ghi ooc huden al te samen zijt

4

dye desen wech veruolcht heb totter doot toe, bindende, ende ouerleuerende in kerckeren, te samen mannen ende vrouwen,

5

ghelijck als ooc de opperste der priesteren mijn tuych is, ⁺ ende die geheele ordene der ouderen van welcken ic ooc brieuen ontfanghen hebbende, totten broederen reysde tot Damascum om met mi te brengen alle die daer geuangen waren tot Ierusalem, op dat si ghepijnicht souden worden.

+ B

6

Maer het is geschiet, ick ouer wech reysende, ende ghenakende bi Damasco, ontrent den middaghe, dat mi haestelick een groot licht omscheen vanden hemel,

7

ende ben gheuallen inder aerden, ende heb gehoort een stem mi segghende. Saule Saule, waer om veruolcht ghi mi? ⁺

+ i.Cor. xv b Gala. v.c

8

Ende ic heb geantwoort. Wie zijt ghi heer? Ende seyde tot mi. Ic ben Iesus van Nazareth, dien ghi veruolcht,

9

ende die met mi waren, hebben dat licht gesien, ende zijn veruaert geweest, mer si en hebben niet ghehoort die stem des gheens, die met mi sprack.

10

Ende heeft mi geseyt, staet op ende gaet tot Damascum, Ende daer sal v geseyt worden, van al dat gheen dat v van noode is om te doen.

11

Maer als ick ouermidts die claerheyt des lichts niet en sach, ⁺ geleyt zijnde by der hant vanden gesellen die met mi waren, ben ic gecomen tot Damascum.

+ C

12

Ende Ananias een goduruchtich man naeder wet ghepresen, door dat getuych alre Ioden die daer wonende waren,

13

comende tot mi, ende mi bistaende, heeft mi gheseyt Saule broeder, ontfanctet gesichte. Ende ic tgesichte inder seluer vren ontfangende, heb hem gesien.

14

Ende hi heeft geseyt. God onser vaderen heuet v bereyt, dat ghi sinen wille soudt bekennen, ende sien dat gheen dat recht is ende hooren die stemme wt sinen mont,

15

⁺want ghi een getuych sult zijn bi allen menschen, dier dingen, dye ghy ghesien hebt ende ghehoort.

+ D

16

Ende nv wat vertoefdi? staet op, ende wert ghedoopt, ende wascht v sonden af, aenroepende sinen naem.

17

Ende het is geschiet, als ic weder om geco-[kolom]men was tot Ierusalem, ende badt inden tempel, dat ic van mi seluen op getogen worde,

18

ende sach hem, segghende tot mi, haest v, ende gaet snelliken wt Ierusalem, want si v getuych van mi niet ontfangen en sullen.

19

Ende ic heb gheseyt. Heer si weten dat ick inden kercker tooch, ende sloech in allen synagogen die gheen die welcke in v geloofden.

20

Ende als dat bloet Stephani dyns getuigen gestort worde, stont ic oock by ende consenteerde mede in sinen doot ende bewaerde die cleederen dye hem dooden.

21

Ende hi heeft geseyt tot mi. Gaet, want ic v verde totten Heydenen senden sal.

22

⁺Ende si hoorden hem tot dit woort toe. Ende met op gheheuen stemmen hebben si gheseyt. Neemt dusdanigen mensche wech vander aerden, want ten is niet behoorlic dat hi sal leuen

+ E

23

Maer als si riepen, ende haer cleederen wech worpen, ende worpen dat sandt inder lucht,

24

so gheboot die Capiteyn hem te leyden inder borcht, ende te worden ghegheesselt, ende gepijnicht, op dat hi weten soude, om wat saeck dat si hem so toeriepen.

25

Ende als si hem met banden gebonden hadden, soo seyde Paulus tot den Centurio by hem staende. Hoortet v toe, eenen Romeynschen mensch ende onuerwesen te geesselen?

26

Dye Centurio dit gehoort hebbende, is totten Capiteyn gegaen, ende heeftet hem vercondicht, seggende. Wat sult ghy gaen doen? want dese mensche is een Romeyn.

27

⁺Ende die Capitein comende tot hem, heeft geseyt. Segt mi, sidi een Romeyn? Ende hi heeft geseyt. Ia ic,

+ F

28

ende die Capiteyn antwoorde. Ic heb dese borgerscap met een grote somme vercregen. Ende Paulus seyde, ende ic bent oec geboren.

29

Daer om zijn si ter stont van hem gesceyden, die hem ondersoecken souden. Ende die Capiteyn heeft oock gheureest, nae dat hy vernomen heeft dattet een Romeyn was ende dat hy hem ghebonden hadde.

30

Maer sdaechs daer na, willende weten sekerlick van wat saeck dat hi besculdicht worde vanden Iode, soo heeft hy hem vanden banden ontbonden, ende geboot den ouderen ende den geheelen raedt te comen. Ende Paulum voortbrengende, stelde hem voor haer.