De Vorsterman Bijbel

§ Dat .xxi. Capittel.

1

⁺ALs wi nv af ghesteken waren, gescheyden zijnde van hen, zijn wij rechts loops ghecomen tot Choum, ende des nauolgenden daechs tot Rhodes, ende van daer tot Pateren.

+ A

2

Ende gecreghen hebbende een scip, dat ouer woude varen in Phenicen, daer in geclommen zijnde, hebben wi af ghesteken,

3

mer als ons Cypren bestonde hem te thoonen, dat ghelaten hebbende ter lufter hant zijn wi gheuaren in Syrien, ende zijn ghecomen tot Tyrus, want daer layde dat schip die vracht.

4

Ende daer discipulen geuonden hebbende, so zijn wi daer seuen dagen ghebleuen. Dye Paulo gheseyt hebben door den gheest, dat hy niet en soude oprisen tot Hierusalem.

5

Ende die daghen ouerghebrocht hebbende, so zijn wi reysende ghegaen, ende si alle met huysurouwen ende kinderen gheleyden ons tot buyten die stadt, ende op dat oeuer op ons knyen vallende, hebben wi gebeden

6

Ende als wi malcanderen te gode beuolen hadden, so clommen wi int schip, mer si zijn weder om gekeert totten haren.

7

⁺Ende als wi die schipuaert volbracht hadden, so zijn wi van Tyro ghedaelt tot Ptolemaiden, ende die broederen gegroet hebbende, zijn wi eenen dach gebleue by haer.

+ B

8

Mer sdaechs daer na ghereyst, zijn wi ghecomen tot Cesarien. Ende ingaende Philippus des Euangelisten huys, dye een vanden seuen was, soo zijn wij ghebleuen by hem.

9

Dese selue hadde vier dochteren dat maechden waren, propheterende.

10

Ende als wi daer somighe daghen bleuen, so is daer toe ghecomen wt Iudeen een Propheet, ghenoemt Agabus.

11

Dese als hi tot ons gecomen was nam hy Paulus gordel, ende bindende hem seluen handen ende voeten, heeft gheseyt. Dit seyt die heylighe geest. ⁺ Die man, wiens dese gordel is, dien sullen die Ioden aldus binden tot Ierusalem, ende sullen hem inder Heydenen handen leueren.

+ C

12

Als wij dese dinghen ghehoort hadden, baden hem, ende dye andere dye van dier steden waren, dat hy niet op en soude reysen

[p. P2v]

tot Ierusalem.

13

Doen heeft Paulus gheantwoort ende geseyt. Wat maect ghi screyende, ende mijn hert bedroeuende? Want ick bereyt ben niet alleen ghebonden te worden, maer ooc te steruen tot Ierusalem voor den naem ons Heeren Ihesu Christi.

14

Maer alsment hem niet en conste ontraden, so zijn si te vreden geweest, seggende. Die wille des heeren moet geschien.

15

Ende na desen daghen bereyt zijnde, reysden wi tot Ierusalem.

16

Ende daer zijn te samen met ons ghecomen somighe wt den discipulen van Cesarien, brengende met hen eenen man van Cypren, Iasonem eenen ouden discipel, by wien wi logeren souden.

17

Ende als wi gecomen waren tot Ierusalem, so hebben ons die broeders gaern ontfanghen,

18

maer des anderen daechs ghinc Paulus met ons tot Iacobum, ⁺ ende alle die priesters zijn tsamen ghecomen.

+ D

19

Ende als hijse gegroet hadde, soo heeft hy haer alle dinghen bisonderlinc vertelt, dye God door sinen dienst onder die Heydenen hadde gewrocht.

20

Ende als zijt ghehoort hadden, hebben si den Heer ghepresen, ende seyden hem, broeder, ghi siet wel hoe veel duysent Ioden datter zijn, die ghelouich gheworden zijn, ende zijn alle vierighe lief hebbers des wedts,

21

maer si hebben ghehoort van v, dat ghi een afganck leert van Moyses, alle den Ioeden die onder den Heydenen zijn, seggende dat si die kinderen niet besnijden en souden noch oock nae der ghewoonten nyet leuen,

22

wat ist dan nv? Tis voorwaer van nooden dat die menichte vergadert, want si sullen hooren dat ghi gecomen zijt,

23

daer omme doet dat ghene dat wi v seggen.

Wij hebben vier mannen, hebbende een ghelofte op haer,

24

⁺dese tot v ghecomen hebbende, suyuert v met haer, ende legt met hen aen, dat si haer hoofden scheeren, ende si sullent alle weten, dat die dingen diese van v ghehoort hebben valsch zijn, maer dat ghi wandelt ooc, die wet bewarende.

+ E

25

Mer vanden ghenen die vanden heydenen geloeft hebben, hebben wij gescreuen, geuende te kennen, dat si hen wachten van dat gheen, dat den afgoden geoffert is, ende van dat bloet, ende vanden verstickte, ende van die oncuysheit.

26

Doen heeft Paulus dye mannen tot hem ghenomen, ende daechs daer na gereynicht zijnde, heeft met haer inden tempel ghegaen, vercondigende dye veruullinge der dagen der suueringhe, ter tijt toe, dat voor een yeghelic van hem een offerhande geoffert wort.

27

Maer als de seuen dagen by na waren vol-[kolom]eynt, so hebben die Ioden die van Asia waren, dat geheele volck verstoort, als si hem inden tempel gesien hadden, ende si hebben aen hem die handen geslagen, roepende.

28

Ghi mannen van Israel, coemt ons te hulpen. Dit is dye selue mensche, die teghen dat volck, ende die wet, ende dese plaetse, alle menschen tot allen plaetsen leert. Daer en bouen heeft hi ooc die heydenen geleit inden tempel, ende heeft dese heylige plaetse gemeen gemaect.

29

⁺Want si hebben gesien Trophimum van Ephesien in die stadt met hem, wien si gemeent hebben dat Paulus inden tempel geleyt hadde.

+ F

30

Ende dye geheel stadt is beroert, ende daer gheschiede eenen oploop des volcs. Ende Paulum aengetast hebbende, togen si hem wt den tempel, ende ter stont zijn die doren gesloten.

31

Maer als si hem sochten te dooden, so ist vercondicht den Capiteyn der heerscaren, dat geheele Ierusalem waer verstoort.

32

Die ter stont ruteren ende Centurionen met hem genomen heeft, ende is gelopen tot haer. Mer als si den Capiteyn ende die ruyteren ghesien hebben, so hielden si op Paulum te slaen.

33

Doen tradt die Capiteyn toe, ende heuet hem gheuanghen, ende gheboden datmen hem met twee ketenen binden soude. Ende hy vraechde, wie dat hy waer, ende wat hy ghedaen hadde,

34

maer die eene riep dit onder tvolck, ende die ander dat. ⁺ Maer als hi niet sekers bekennen en conste, ouermidts dat gherucht, so heeft hy gheboden datmen hem leyden soude inder borcht.

+ G

35

Ende doen hi aen die trappen quam, ist geschiet dat hi gedragen wort vanden ruyteren, om dat ghewelt des volcs,

36

want daer volchde een menichte van volck roepende, doet hem wech.

37

Ende als Paulus inder borcht bestonde gheleyt te worden, seyde hi totten Capiteyn Mach ick niet wat tot v spreken? Die welcke hem gheseyt heeft. Condt ghy Griecs?

38

Sijt ghi niet dye Egiptenaer, dye voor desen daghen eenen oploop ghemaect hebt, ende wt geleyt inder woestine vier dusent heymelijcke moordenaers?

39

Paulus heeft gheseyt. Ick ben een Ioede, een borger van Tharsen, eenre vermaerder stadt in Cilicien, maer ick bidde v, oorlooft mi te spreken totten volcke.

40

Ende als hijt hem toe hadde ghelaten, staende Paulus op die trappen, so heuet hi metter hant gewenct totten volcke. Ende een grote stilte daer gemaect zijnde, heeft hijse in Hebreeuscher talen toe gesproken, segghende.