De Vorsterman Bijbel

§ Dat .xviij. Capittel.

1

⁺DAer nae, gegaen wesende van Athenen, is gecomen tot Corinthen,

+ A

2

ende vindende eenen Iode genoemt Aquila, geboren wt Ponto, die onlancx ghecomen was wt Italien, ende zijn huysurouwe Priscilla, want Claudius geboden hadde, dat al die Ioden wt Roomen reysen souden. Tot desen is hi gegaen.

3

Ende want hi vander seluer const was so bleef hi bi haer, ende wrochte. Ende haer conste was tenten te bereyen.

4

Ende hi disputeerde inder Synagoghen alle Sabboth, openbarende den naem Iesu ons heeren, ende radende den Ioden ende den Griecken.

5

Maer als Sylas ende Tymotheus gecomen waren van Macedonien, so was Paulus naerstich int woort, den Ioden betuigende, dat Iesus, Christus was.

6

⁺Maer als si daer tegen seggende waren, ende blasphemie sprekende, so heeft hi zijn cleederen wt scuddende, gesproken tot haer. V bloet si op v hooft, Ic sal voortaen reyn totten heydenen gaen.

+ B

7

Ende van daer vertreckende, heeft hi gegaen in eens mans huys genaemt Tytus Iustus, die God dienende was, wiens huys rakende was die Sinagoghe.

8

Ende Crispus die ouerste der Synagogen heeft den heere gelooft, met al zijn huys, ende veel vanden Corinthen hoorende, geloofden, ende werden gedoopt.

9

Ende die heere seide snachts Paulo, door een visioen. ⁺ En wilt niet vreesen mer spreect, ende en swiget niet,

+ C

10

daerom, dat ic bi v ben, ende niemant en sal v aengaen, om v [kolom] last te doen, want ic in deser stadt veel volcs hebbe,

11

Ende hi heeft daer geseten een iaer lanc ende ses maenden, leerende haer Gods woort.

12

Ende als Gallio stadthouder van Achaien was, ⁺ so zijn die Ioden met eendrachtighen moede opgeresen tegen Paulum, ende hebben hem gebrocht voor den rechter stoel,

+ D

13

seggende, Dese raet, den menschen, teghen der wet God te eeren.

14

Maer als Paulus nv bereyde den mont te openen, seyde Gallio totten Ioden, O ghi Ioden, waert dattet eenich onrecht, oft bose misdaet ware, so soude ic v wel te recht liden,

15

maer ist een questie vanden woorden ende namen, ende van uwer wet, soe siet ghi selue toe, want ic gheen rechter van dese dingen en wil zijn.

16

Ende hi heeft haer verdreuen vanden rechter stoel.

17

⁺Maer die Griecken al tsamen aengeuat hebbende Sostenem, den ouersten der Synagogen, sloegen hem voor den rechterstoel, ende Gallio en achte op dese dinghen niet.

+ E

18

Ende Paulus noch daer nae vertoeuende veel dagen den broederen adieu geseyt hebbende, is geuaren in Syriam, ende dat met Priscilla ende Aquila, die zijn hooft geschoren hadde in Cenchren, want hi hadde een gelofte.

19

Ende hi is gecomen tot Ephesen, ende heeft haer daer gelaten, maer hi ingegaen zijnde die Synagogen, disputeerde metten Ioden.

20

Ende als si hem baden, dat hi wat meer tijts bi haer bliuen woude, en heeft hijs niet geconsenteert,

21

ende hi is van haer ghescheyden, seggende, Ick sal wederom tot v comen, wilt God. Ende hi is gereyst van Epheso.

22

Ende als hi gecomen was tot Cesarien, ⁺ ende op ghegaen was, ende die gemeynte gegroet hadde, so reysde hi op tot Antiochien,

+ F

23

ende wat tijts daer vertoeft hebbende, is gereyst, doorwandelende al geheel dat lant van Galatien ende van Phrigiam, stercekende alle die discipulen.

24

Maer tot Ephesien is ghecomen een Iode geheeten Appollo, van Alexandrien geboren, een wel sprekende man, machtich in scriften,

25

⁺dese was onderwesen inden wech des heeren, ende vierich van gheest sprac hi, ende leerde naerstelic dat ghene dat van Iesu was, wetende alleen dat doopsel van Ioannes.

+ G

26

Ende dese heeft bestaen vrilicken inder Synagogen te doen, Wien als Priscilla ende Aquila gehoort hadden, hebben si hem genomen tot hen, ende hebben hem inden wech des heeren volmaecteliker onderwesen,

27

mer als hi woude reysen na Achaien, te vermanen de broeders, hebben si ghescreuen den discipulen, dat si hem ontfanghen souden

[p. P1r]

Ende als hi daer ghecomen was, holp hi den ghenen veel die daer ghelooft hebben,

28

want hy verwan die Ioden zeer, ende openbaerliken bewisende door scriften, dat Iesus Christus was.