De Vorsterman Bijbel

§ Dat .xij. Capittel.

1

⁺+ OP die selue tijt, sandt Herodes die coninck zijn macht, om te quellen sommighe vander kercke.

+ A

2

Ende hi heeft gedoot Iacobum, Ioannis broeder, metten swaerde,

3

Ende siende dattet den Ioden behaechde, so heeft hi voort gegaen om Petrum ooc te vangen. Ende het waren die dagen Azimorum.

4

Als hi hem dan ooc geuangen hadde, werp hi hem ooc inden kercker, leuerende hem ouer te bewaren vierwerf vier ruyteren, willende na Paesschen hem voor den volcke wt brengen.

5

Ende Petrus wert inden kercker bewaert, maer dat ghebet gheschiede voor hem tot God sonder ophouden, vander kercke.

6

Ende als Herodes hem woude voort brengen, inder seluer nacht sliep Petrus tusschen twee ruyters, gebonden met twee ketenen, ende die wachters voor die duere bewaerden den kercker.

7

⁺Ende siet, die engel des Heeren heeft daer bi gestaen, ende een licht scheen in die wooninge, ende slaende Petrum aen de side, heeft hi hem opgewect, seggende, Staet op haestelic. Ende die ketenen vielen af, van sinen handen.

+ B

8

Ende die engel sprac tot hem, Scort v op, ende doet v solen aen, ende hi dede also. Ende hi seyde hem, Slaet v cleet omme, ende volcht my.

9

Ende wt gaende, volchde hi hem, ende hi en wiste niet dattet warachtich was, dat door den Engel geschiede, maer hem dochte dat hi een visioen sach.

10

Als si dan door die eerste ende door die anderde bewaringe gegaen waren, zijn si gecomen tot die yseren poorte, die inder stadt leydet, die welcke haer van selfs geopent is. Ende wtgaende, zijn si een strate door gegaen, ende ter stont sceyde die engel van hem.

11

Ende Petrus tot hemseluen gecomen zijnde, heeft gesproken, Nv weet ic warachtelic, dat die Heere sinen engel gesonden heeft, [kolom] ende heeft mi verlost wt die handt Herodis ende wt alle verwachtinghe des Ioetschen volcs.

12

Ende als hi hem bedacht, so quam hi voor dat huis Marie der moeder Ioannis, wiens bynaem is geweest Marcus, daerder vele vergadert waren, ende biddende.

13

Als dan Petrus voor aen die duere clopte, so ginc een meysken voor, om te siene, gheheeten Rhode.

14

⁺Ende als si Petrus stemme kende, so en dede si die duere niet open van blischappen, maer binnen loopende heeft vercondicht, dat Petrus stont voor die duere.

+ C

15

Ende si hebben geseyt tot haer, Ghi raest, Maer si bleef daer by, dattet alsoe was. Maer si seyden. Het is sinen engel.

16

Ende Petrus, bleef volherdich cloppende. Als si nv die duere open gedaen hadden, so hebben si hem gesien, ende hebben hen verscrict.

17

Ende als hy haer een teeken hadde gedaen met zijnder hant, dat si swigen souden, heeft hi haer vertelt, hoe dat die heere hem wt geleyt hadde wt den kercker. Ende hi seyde vercondicht dit Iacobo, ende den broeders. Ende wt ghegaen zijnde, is vertogen in een ander plaetse.

18

Alst nv dach gheworden was, wasser gheen cleyn turbacie onder die ruyteren, wat van Petro geschiet soude mogen zijn.

19

Maer Herodes, als hi hem gesocht had, ende niet gheuonden, dye bewaerders onderuraecht hebbende, so liet hise wechleyden. Ende neder climmende van Iudea, in Cesarien, so is hi daer gebleuen.

20

⁺Ende Herodes was vertoornt, op die van Tyro ende Sidon. Ende si quamen eendrachteliken tot hem, ende hebben Blastum wt gemaect, die des conincx camerlinc was, ende begheerden vrede, om dat haer lant van des conincs victalis geuoet wert.

+ D

21

Ende op eenen gesetten dach, sadt Herodes met een coninclijc habijt gecleet op den rechter stoel, ende vertrac een reden tot haer.

22

Ende dat volck riep hem toe, dat is een Gods stemme, ende gheen menschen.

23

Maer ter stont heeft hem geslagen de engel des heeren, want hi God de eere niet en hadde gegeuen, ende wt gegeten zijnde van den wormen, so heeft hi den gheest ghegeuen.

24

Dat woort Gods wies, ende wert vermenichfoudicht.

25

Ende Barnabas ende Paulus zijn weder gecomen te Ierusalem, haeren dienst volbrocht hebbende, nemende met hen ooc Ioannem, wiens toenaem was Marcus.