De Vorsterman Bijbel

§ Dat .x. Capittel.

1

⁺ENde daer was een man te Cesarea, genoemt Cornelius Centurio, vanden bende welcke hiet die Italiaensche,

+ A

2

religioes ende God vreesende met alle zijn huys, veel aelmissen den volcke geuende, ende altijt god biddende.

3

Dese heeft gesien door een visioen openlic, omtrent der negender vren van den dach, den engel Gods tot hem ingaende, ende hem seggende, Corneli.

4

Ende hi aensiende hem, ende met vreese beuangen, heeft geseit Wie zijt ghi Heere? Ende hi heeft hem geseyt, V gebeden ende v aelmissen zijn opgeclommen, ⁺ totter gehoochnisse in die tegenwoordicheyt Gods,

+ tobie. .xij.c

5

Ende seyndt v mannen tot Ioppen, ende ontbiet Symonem, die mede ghenoemt wort Petrus.

6

Dese is ghelogeert by Symonem eenen leertouwer, die een huys heeft bider zee. Dese sal v seggen wat v van noode is te doen.

7

Ende als die engel wech gegaen was die hem sprac, so heeft hi twee van sinen huysgesin geroepen, ende eenen ruyter die God vreesde wt die hem onderdanich waren,

8

den welcken als hijt al vertelt hadde, heeft haer te Ioppen gesonden.

[p. O4r]

9

⁺Ende daechs daer na als si reysden, ende bi der stadt quamen, is Petrus int opperste vanden huyse geclommen, om te bidden, ontrent die seste vre.

+ B

10

Ende als hi hongerde, woude hi spijs proeuen, ende si die spijs bereydende, so is een optreckinge des herten op hem geuallen.

11

Ende hi heeft gesien den hemel op gedaen, ende neder comende tot hem een vat gelijc een groot linden laken, met vier hoecken tsamen gebonden, vanden hemel totter aerden neder gelaten worden,

12

in welcke waren alle vieruoetige dieren des aerde, ende cruypende dieren, ende voghelen des hemels.

13

Ende daer is een stemme tot hem ghesciet, Petre, staet op, slaet doot, ende eet.

14

Ende Petrus heeft geseyt, dat si verre van mi, Heere, ⁺ Want ick noyt yet gemeens ende onreyns ghegeten en hebbe,

+ Roma. ij.b Ephe. vi.b Collo. iij.b

15

ende die stemme weder om tot hem. Dat Godt ghereynicht heeft, en segt ghi dat niet gemeen.

16

Ende dit is ten derden mael geschiet. Ende t vat is weder om inden hemel genomen.

17

⁺Ende als Petrus twifelde bi hem seluen wat dat visioen was, dat hi gesien hadde siet, de mannen die van Cornelio gesonden waren, geuraecht hebbende, na Simons huys, hebben ghestaen voor die door.

+ C

18

Ende als si daer een wt geroepen hadden, vraechden si, oft Simon, die mede Petrus genoemt wort, daer herberch hadde.

19

Ende als Petrus dochte vant visioen, soe heeft hem die gheest geseit, Siet, drie mannen soecken v,

20

aldus staet op, ende climdt af, ende gaet met haer, niet twifelende, Daerom, want ic haer gesonden hebbe.

21

Ende Petrus af comende tot die mannen, heeft geseyt, Siet ic ben die ghene dien ghi soect, Wat is die saeck, daer ghi om gecomen zijt?

22

Welcke hebben gheseit, Cornelius Centurio, een rechtuerdich man, ende God vreesende, ende een goet getuych hebbende van alt Ioetsche volc, die is door beuel vermaent vanden heyligen engel, dat hi v ontbieden soude in zijn huys, ende woorden van v hooren.

23

Aldus heeft hy haer (ingeroepen zijnde) ter herbergen ontfanghen.

⁺ Ende tsanderen daechs, is Petrus met haer gereyst, ende sommige vanden broederen van Ioppen zijn hem geuolcht.

+ D

24

Ende tdaechs daer na zijn si in Cesaream gecomen. Ende Cornelius verwachtende haer, tsamen geroepen hebbende zijn magen ende vrienden.

25

Ende alst gesciet is dat Petrus ingecomen was, soe is Cornelius hem te gemoet gecomen, ende voor zijn voeten vallende, heeft hem aengebe-[kolom]den.

26

Maer Petrus heeft hem opgherecht, seggende, Staet op, ende ic ben ooc een mensche.

27

Ende sprekende met hem, is hi ingegaen ende hi heefter veel geuonden, die daer te samen gecomen waren,

28

ende heeft tot haer geseyt, Ghi weet, dattet eenen Iode niet gheoorloeft en is geuoecht te worden, ⁺ oft te comen tot eenen vremdelinc, Maer God heeft mi bewesen, dat ic gheenen mensch gemeen oft onreyn heeten en soude,

+ tobie. xij.c.

29

waerom ic ontboden zijnde, sonder toeuen gecomen ben. Aldus vraech ic, om wat saecke hebt ghi mi ontboden?

30

Ende Cornelius heeft geseit van nv den vierden dach, ⁺ was ic te negen vren biddende in mijn huys, ende siet, een man heefter voor mi gestaen in een blinckende cleet, ende heeft geseyt,

+ E

31

Corneli, V gebet is verhoort, ende v aelmissen zijn in gehoochnis ghehouden in Godts aensicht.

32

Daerom sendt in Ioppe, ende ontbiet Symonem, die mede genoemt wort Petrus, Dese is geherbercht in die huysinge van Symon de leertouwer bi die zee, die welcke als hy coemt, v spreken sal.

33

Daerom heb ic ter stont tot v gesonden, ende ghi hebt welgedaen dat ghi gecomen zijt. Daerom zijn wi alle hier tegenwoordich voor God, op dat wi mogen hooren al tghene dat v vanden Heere geboden is.

34

+ Ende Petrus sinen mont op doende, heeft geseyt, Inder waerheyt heb ic beuonden, dat God en is gheen wtnemer der personen, ⁺

+ Roma. ij.b Ephe. vi.b Collo. iij.b

35

maer in alderley nacien, die God vreest, ende rechtueerdicheyt doet, die is hem aengenaem.

36

Twoort heeft God gesonden den kinderen van Israel, ⁺ vercondigende vrede door Iesum Christum, Dese is die Here van allen.

+ F

37

Ghi weet dat woort dat verbreet is door geheel Iudeen, beghinnende van Galileen, na dat doopsel dwelc Ioannes predicte,

38

hoe Godt Iesum van Nazareth gesalft heeft, met den heiligen gheest ende cracht, die welcke door ghegaen is, wel doende, ende gesont makende, al die vanden duyuel verdruct waren, want Godt was met hem.

39

Ende wi zijn getuygen, van al dat hi gedaen heeft int Ioetsche lant, ende te Ierusalem, welcken ghehangen zijnde aent hout, si gedoot hebben.

40

Desen heeeft God verwect ten derden dach, ende hi heeft hem vertoont, op dat hi openbaer soude worden

41

niet alle volck, maer den getuygen, daer toe te voren van Godt wtuercoren, ons, die welcke te samen gegeten ende gedroncken hebben met hem, na dat hi vanden dooden verresen is gheweest.

[p. O4v]

42

+ Ende hi heeft ons gheboden, dat wijt den volcke prediken souden ende betuygen, dat hi die ghene is welcke van God geset is, een rechter van leuende ende doode.

43

Dese gheuen alle die propheten ghetuych, verghiffenis der sonden ontfangen door sinen naem, al den ghenen die in hem geloouen. *

44

⁺Als Petrus noch dese woorden sprac, is die heylighe gheest gheuallen op al die ghene diet woort hoorden.

+ G

45

Ende dese die vanden geslacht der besneden geloofden, also veel alsser met Petro ghecomen waren, hebben hen verscrict, dat die gaue des heyligen gheests oock in die Heydens gestort wert,

46

want si haer met talen hoorden, sprekende, ende God groot makende.

47

Doen heeft Petrus geantwoort, Macher oock yemant dat water verbieden, dat dese niet gedoopt en werden, die den heyligen gheest ontfangen hebben, gelijck als wi?

48

Ende hi heeft geboden, dat si gedoopt souden worden, inden naem des heeren Iesu Christi. *

Doen hebben si hem ghebeden, dat hy sommige dagen bliuen soude by haer.