De Vorsterman Bijbel

§ Dat .vi. Capittel.

1

⁺IN dien daghen, alst getal der discipulen vermeerderde, isser een murmuracie opgeresen, van die Griecken tegen die Hebreeuschen, daerom, want haer weduwen veracht werden inden dagelijschen dienst.

+ A

2

Ende die twaelue, dye menichte der discipulen tsamen roepende, hebbben geseit

[p. O1v]

Ten is niet recht, dat wi verlaten dwoort Gods, ende ter tafelen dienen.

3

Daerom broeders, kiest seuen mannen wt v van goede getuychnisse, vol vanden heyligen gheest ende wijsheyt, den welcken wi stellen mogen op dat werc,

4

ende wi sullen ons becommeren met bidden, ende dwoort aen te dienen.

5

⁺Ende dese woorden behaechden voor de geheel menichte. Ende si hebben wtuercoren Stephanum, een man vol geloofs, ende vanden heyligen geest ende Philippum, ende Prochorum, ende Nicanorem, ende Timonem, ende Permenam, ende Nicolaum een vremde van Antiochien.

+ B

6

Dese hebben si gheset in die teghenwoordicheyt der Apostelen, ende als si gebeden hadden, so hebbensi die handen op haer geleit

7

Ende dwoort Gods wies, ende tgetal der discipulen wert te Ierusalem zeer vermenichfuldicht, ⁺ ende een groote schare der priesteren waren den gelooue gehoorsaem.

+ C

8

+ Stephanus vol van gracien, ende stercheyt, thoonde wonderlicheden ende groote teekenen int volc

9

Ende daer zijn sommige opgestaen wter Synagoge, die genoemt wort, vanden Libertinen ende van Cyrenen, van Alexandrinen, ende van Cilicien, ende van Asien, disputerende met Stephano.

10

Ende si en mochten niet wederstaen die wijsheyt, ende den gheest die daer sprac.

11

⁺Doen hebben si toegemaect mannen die welcke segghen souden. Wy hebben hem hooren blasphemighe woorden segghen, teghen Moysen ende God.

+ D

12

Ende si hebben tvolc beroert, ende de ouders, ende de Scriben ende oueruallende, hebben si hem geuangen, ende hebben hem inden raet gebrocht,

13

ende hebben daer valsche getuygen gestelt, welcke seggen souden, Dese mensch en hout niet op te spreken woorden tegen dese heilige plaetse ende wet,

14

want wi hebben hem hooren seggen, Dese Iesus van Nazareth, sal die plaetse verderuen, ende die insettinghe veranderen die Moyses ons geleuert heeft.

15

Ende al die inden raet saten, hem aensiende, hebben gesien zijn aensicht, als eens Engels aensicht.