De Vorsterman Bijbel

§ Dat .iij. Capittel.

1

⁺PEtrus ende Iohannes clommen inden tempel totter neghender vren des bedinghes.

+ A

2

Ende een man welck cruepel was van zijns moeders lichaem worde gedragen, welken si dagelicx setten voor die poort des tempels, die welcke genoemt wort dye schone, op dat hy aelmis soude begeeren, van dye inden tempel quamen.

3

Dese als hy ghesien hadde, dat Petrus ende Ioannes begonnen inden tempel te comen, badt hy, op dat hi een aelmis soude ontfanghen.

4

Ende Petrus met Ioannes hem aensiende, heeft geseyt. Siet ons aen,

5

ende hy sach neerstich op haer, hopende dat hy van haer wat ontfanghen soude.

6

Petrus heeft geseyt. Siluer ende gout en is met my niet, dat ick heb dat geue ic v. Inden name Iesu Christi van Nazareth, staet op, ende wandelt.

7

Ende zijn rechter hant nemende heeft hem opgerecht. Ende ter stont zijn gesterct zijn versenen, ende planten der voeten,

8

ende op springhende, heeft hy gestaen, ende wandelende, ende is met haer inden tempel ghegaen wandelende ende springhende, ende God louende.

9

⁺Ende al tvolck heeft hem wandelende ende god louende gesien,

+ B

10

ende si hebben hem gekent dat hy was die om aelmis geseten hadde aen die schone poorte des tempels. Ende si zijn veruult van verscrickinge ende verwonderinge, op datter geschiet was.

11

Ende als si Petrum ende Ioannem sagen, is al tvolck tot haer

[p. N8r]

ghelopen int poortael: welck genoemt wort Salomonis, seer verwonderende.

12

⁺Als Petrus dyt ghesien hadde, heeft hy gheantwoort totten volcke. Ghy mannen van Israel, wat verwondert ghy daer af, oft wat siet ghy ons aen, alleens als oft wi door onse cracht ofte macht desen hadden doen wandelen?

+ C

13

+ God van Abraham, ende god van Isaac, ende god van Iacob. God van onse vaderen heeft zijnen zoon Iesum geglorificeert, ⁺ die welcke ghi gheleuert ende versaect hebt int aensicht van Pylatus, na dien dat hi geordeelt hadde hem quijt gelaten te worden.

+ Mat. 27 b Mar. xv.a luce. 23.c ioan. xviij.

14

Maer ghi hebt den heyligen ende rechtuerdigen versaect, ende ghi hebt begeert dat hi v een man een dootslager vrij geuen soude,

15

mer den geuer des leuens hebt ghi gedoot, den welcken God heuet vanden dooden verwect, wiens ghetuygen dat wi zijn.

16

Ende door tgheloue zijns naems, heeft hi in desen welck ghi siet ende kent, sinen naem vast gemaect int geloof, twelcke door hem is, heeft hem in tegenwoordicheyt van v allen dese gesontheyt gegeuen.

17

⁺Ende nv weet ick broeders dat ghijt wt onwetenheyt gedaen hebt, ⁺ geliken als oeck v princen

+ D

+ Ec. xvij.a Mat. iiij.c Mar. i.b

18

god heeft veruult, tgeen dat hy voor kundicht hadde, door den mont van al zijn propheten sinen Christum te lijden.

19

Daer omme doet penitency ende wert bekeert, op dat v sonden wtgedaen mogen worden *

20

op dat wanneer dye tijden van vercoelingen comen sullen vant aensicht gods, ende seynden sal dan ghenen, die v te voren gepredict is Iesum Christum,

21

die welcke moet den hemel ontfangen tot die tijden des wederomsettings van alle dingen, die welcke god gesproken heeft van tbeginsel, door den mont van al zijn heylige propheten.

22

Moyses heeft geseyt. Dye Heere uwe God sal v een propheet verwecken van v broeders mijns gelijc. ⁺ Hem sult ghi hooren na al tgeen dat hi v seggen sal.

+ Deu. xviij c

23

Want tsal geschien dat alle siel die welc den propheet nyet horen en sal, wtgedaen sal worden van tvolck.

24

Ende alle Propheten dye van Samuel af, ende daer nae gesproken hebben, hebben dese dagen vercondicht.

25

Ghy zijt kinderen der Propheten ende des testaments, welck god gesedt heeft tot onse vaderen, seggende tot Abraham In v saedt sullen alle geslachten des aerden gebenedijt worden. ⁺

+ Genesis. xij.a

26

V heeft god eerst, na dat hi zijnen soon Iesum verwect hadde, gesonden v gebenedijende, op dat een yegelic van v hem keeren soude van zijn boosheyt.