De Vorsterman Bijbel

§ Dat .ij. Capittel.

1

⁺ENde al die dagen van pinxteren veruult worden, waren si alle eendrachtelick inde selfte plaets.

+ A

2

Ende haestelick isser een geluyt vanden hemel geschiet: gelijcken van een stercke wint comende, ende heeft veruult dat gheheele huys, daer si sittende waren.

3

Ende haer openbaerden gedeylde tongen gelijcken vyer: ende heeft gheseten op elck van haer,

4

ende si zijn al veruult gheweest metten heylighen gheest, ende hebben begonnen te spreken met verscheyden tongen, gelijcken haer den heylighen gheest gaf wt te spreken. [kolom]

5

⁺Ende te Ierusalem waren Ioden wonende, religiose mannen, wt alle nacien dye onder den hemel zijn.

+ B

6

Als dese stemme gheschiet was, isser een menichte tsamen gecomen, ende si is verstoort geweest, van dat een yegelic haer hoorde spreken met zijn tael.

7

Ende si verscricten hem, ende verwonderden, seggende onder haer. Siet, en zijn al dese die daer spreken niet Galileesche?

8

Ende hoe hebben wi ghehoort een yegelick ons tael, in welcke wi geboren zijn?

9

Parthi, ende Medi, ende Elamite, ende die inwoonders van Mesopotamia, ende Iudea, ende Capodocia, van Ponto, ende Asia,

10

Phrigia, ende Pamphilia, Egipto, ende van die deelen van Lybia, die welcke ontrent Cyrena leyt. Ende die vreemde Romeynen,

11

ende die Ioden ende Proselyti, Cretes ende Arabes, wi hebben hooren haer sprekende in onse talen grootheden Gods. *

12

⁺Ende si verscricten alle gader, ende verwonderden, segghende onder haer. Wat wilt dit doch wesen?

+ C

13

Maer die ander seyden, bespottende. Si zijn met most veruult.

14

Ende Petrus staende met die .xi. heeft verheuen zijn stemme, ende heeft tot haer gesproken. Ghi Ioetsche mannen, ende alle ghi die te Ierusalem woent, dit sult ghy weten, ende ontfanct met v ooren mijn woorden,

15

want dese en zijn nyet droncken als ghy meent nae dattet die derde vre des daechs is.

16

Mer dit is tgheen datter geseyt is door den propheet Iohel. ⁺

+ Iohe. ij.d.

17

Ende tsal inde laetste dagen wesen (seyt god) Ick sal wtstorten van mijnen gheest op alle vleesch. Ende v sonen, ende v dochteren, sullen propheteren, ende v ionghelingen sullen visioenen sien, ende v ouders sullen dromen dromen.

18

Ende oeck op mijn knechten ende op mijn dienstmaechden sal ick in dien dagen van mijnen gheest wtstorten, ende si sullen propheteren,

19

ende ick sal voorteekenen gheuen vanden hemel bouen, ende teekenen inder aerden beneden, bloet ende vuer, ende walmt van roock

20

Die sonne sal in duysternisse verkeert worden, ende die maen in bloet, eer dat die groote ende openbaerliken dach des Heeren comen sal.

21

Ende het sal wesen, ⁺ dat so wie den naeme des Heeren aenroepen sal, dye sal behouden wesen.

+ Roma. x.c.

22

⁺+ Mannen van Israel, hoort dese woorden, Iesum van Nazareth een man van God vertoont tot v door crachten ende wonderlicheden ende teekenen, die welcke God door hem gedaen heeft int midden van v, als ghy oock selfs weet.

+ D

23

Desen met opgesetten raet ende voorwetentheit gods, geleuert hebbende inden

[p. N7v]

handen der booser menschen hebt ghi ghedodet,

24

den welcken god verwect heeft, nae dat hy die pinen der hellen ontbonden hadde, geliken alst onmoghelick was, dat hi daer af gehouden soude worden.

25

Want Dauid seyt van hem. ⁺ Ick voorsach den here altijt voor my, want hy is aen mijn rechter hant, dat ick niet bewegen en worde.

+ Psalm. xv

26

Daer om is mijn herte verblijt, ende mijn tonghe heeft haer verhuecht, daer bouen sal noch mijn vleesch rusten in hope. ⁺

+ 3.Regum. 2 a

27

Want ghy en sult mijn siel niet verlaten in die helle, noch ghy en sult niet gehengen dat v heylige verderfnis siet.

28

Ghi hebt mi bekent ghemaect die wegen des leuens, ghi sult my met blijschap veruullen met uwen aensichte. *

29

⁺Ghi mannen, broederen, ick mach stoutelic seggen tot v, van Dauid de patriarcha, dat hy gestoruen is ende begrauen, ende zijn graft is by ons, totten dach van huyden.

+ E

30

Want na dien dat hi een Propheet was, ende wiste dat God hem met eenen gesworen eedt ghesworen hadde, ⁺ dattet geschien soude dat van die vrucht zijnder lenden een soude sitten op zijn stoel,

+ psal. cxxxi

31

voorwetende, heeft hy van die verrisenis Christi ghesproken, dat hi niet verlaten en is in die helle, noch zijn vleesch gheen verderfnis ghesien en heeft.

32

Desen Iesum heeft God verwect, wiens ghetuyghen wy alle zijn.

33

⁺Waer om doer die rechterhant gods verheuen zijnde, ende dye belofte des heylighen gheest vanden vader ontfanghen hebbende heeft hy dese ghaue wtgestort, twelck ghy siet ende hoort,

+ F

34

want Dauid en is niet in die hemelen gheclommen, ⁺ maer hy seyt. Die here heeft gheseyt mijnen heere: sidt aen mijn rechterhant,

+ Psal. c.ix.

35

tot dat ick uwe vyanden setten sal een voetschabel dijnre voeten.

36

Daer om sal tgeheele huys van Israel sekerlick weten, dat God een heere, ende Christum ghemaect heeft, desen Iesum, welcken ghi ghecruyst hebt.

37

Als si dit gehoort hadden, zijn si bewegen gheweest van herten, ende hebben gheseyt tot Petrum ende die ander Apostelen. Wat sullen wi doen, ghi mannen, ende broeders?

38

Petrus seyt haer. Doet penitencie van v sonden, ende laet een yegelic van v gedoopt worden inden naem Iesu Christi, tot verghiffenisse der sonden ende ghi sult ontfanghen die gaue des heylighen gheests.

39

Want dye beloftenisse is v geschiet, ende v kinderen, ende al die ghene die varre zijn, de welcke God tot hem roepen sal, die onse Heere is. [kolom]

40

Ende met veel ander woorden heeft hi betuycht, ende haer vermaent seggende. Wort behouden wt dese bose geslacht.

41

Daer om de gheen die zijn sermonen ontfangen hebben zijn gedoopt. Ende daer zijn op dien dach toe ghesedt, ontrent drie dusent sielen.

42

⁺Ende si varen volherdende in de leeringe der Apostelen, ende die gemeenschap des brekings broots, ende in bedingen.

+ G

43

Ende alle siele heeft een vreese gecregen, ende veel wonderlicheden ende teykenen worden ghedaen door die Apostelen in Hierusalem.

Ende een grote vreese was in hen allen.

44

Ende al die geloofden waren tsamen, ende hadden alle dinc gemeen.

45

Ende vercochten haer possessien ende haer goeden, ende deeldent alle gader nae dat een yegelick van node was.

46

Ende daghelics eendrachtelich inden tempel volherdende ende by die huysen broot brekende, namen si spijs met blijschap ende simpelheit van herten God louende,

47

ende gonst hebbende by al tvolck Ende die Heere vermeerderde alle dage dye daer salich werden in dat selue.