De Vorsterman Bijbel

§ Dat .xi. Capittel.

1

⁺UOort dat geloue is een wesen dier dingen welcke gehoopt worden, ende een bewijs der dinghen dye niet gesien en worden.

+ A

2

Want doer desen hebben de ouders getuychnisse vercregen.

3

Doer desen geloue verstaen wi: dat die tijden perfect ghemaect zijn doer dat woort gods, om dat wt onsienlike dinghen, sienlike dinghen worden souden. ⁺

+ Genesis. i.a

4

Doer tgeloue, ⁺ heeft Abel gode geoffert een oueruloediger offerhande dan Cain. Doer welcke hi verdient heeft een ghetuychnisse dat hi rechtuaerdich was: als god was gheuende ghetuychnisse van zijnre gauen, ende doer dese doot wesende, spreect hi noch.

+ Genesis. iiij a

5

⁺Doer tgeloue, ⁺ is Enoch opgenomen, om dat hi den doot niet sien en soude? noch hi en is niet geuonden, ouermidts dat hem god opgenomen hadde. Want eer dat hi opgenomen wort, so hadde hy verworuen ghetuychnis dat hy God behaechde.

+ B

+ Ec. 44.c. Sapi. 4.b

6

Sonder geloue, ist onmogelick gode te behagen. Want wie tot god gaet, desen ist van node te gelouen dat god is, ende dat hi is een loongeuer der gheenre dye hem soeckende zijn.

7

⁺Doer tgeloue, ⁺ Noe een antwoort ontfanghende van het ghene dat nyet ghesien en werde: vreesende heeft getimmert een Arck tot salicheyt zijns huys, doer welcken hi verdoemt heeft die werelt, ende is gheworden [kolom] een erfghenaem van dye rechtuerdicheyt, welcke doort gheloue is,

+ C

+ Genesis. vi.d

8

Doer tgeloue, ⁺ Abraham geroepen zijnde, heeft gehoorsaem gheweest, als dat hy wtgaen soude in een plaetse, welcke hi ontfangen soude in een erfnisse. Ende hi is wtghegaen, niet vetende waer hy comen soude.

+ Genesis. xij.a ende .xiij.a

9

Doer tgeloue heeft hy gewoont int lant des beloftenis, ⁺ als een vremt. Wonende in tabernaculen met Isaac ende Iacob, mede erfgenamen der selfder beloftenissen,

+ Genesis. xiij a

10

want hi verwachtede een stadt hebbende fundamenten: welcker tymmerman ende scepper god is.

11

Doer tgeloue, ⁺ heeft oec Sara onuruchtbaer ontfangen cracht in dye ontfanginge des zaedts bouen haren tijt: want si hem ghetrouwe gelooft heeft te wesen, diet belooft hadde. ⁺

+ Ge. xxi.a.

+ Genesis. xv.a

12

Daer om zijn si wt eenen voortghebracht die nacomelinghen, ende als hy tot zijn iaren ghecomen was, in also groten ghetal als zijn die sterren des hemels, ende ghelijcken dat zant, dat welcke is by den oeuer des zees ontallick.

13

Alle rechtuerdige zijn ghestoruen naden geloue, ⁺ niet ontfangende die beloftenissen: maer van verre die aensiende, ende groetende, ende belidende, dat si gasten waren ende vreemde inder aerden.

+ D

14

Want wie dit segghen bewisen dat si soecken een eygen lant.

15

Ende in dien si des gedachtich geweest hadden, vanden welcken si gereyst waren: so hadden si tijt weder omme te keeren.

16

Maer nv, begheeren wi een beter lant, dat is dat hemelsche. Daer om en schaemt hem God niet geheeten te worden haer God, ⁺ want hy hadde haer bereyt een stadt.

+ Exo. iij.a.

17

Doer tgeloue, ⁺ heeft gheoffert Abraham Isaac, als hi beproeft werde, ende heeft geoffert sinen eenigen geboren, inden welcken hi ontfangen hadde die beloftenissen,

+ Genesis. xi.a. Ec. 44.c.

18

totten welcken geseyt was. In Isaac sal v dijn saet geheeten worden,

19

seker meinende dat god oec mogen soude verwecken tzaet vanden doden, waer om dat hi hem oec in een parabel ontfangen heeft

20

Doer tgeloue, ⁺ heeft gebenedijt Isaac, sinen soon Iocob ende Esau van toecomende dingen

+ Genesis. 27.c Ge. 48.c

21

⁺Doer tgeloue Iacob steruende, ⁺ heeft ghebenedijt een yegelick kint van Ioseph, ende heeft aengebeden topperste zijns roedes.

+ E

+ Genesis. l.d. Exo. ij.a

22

Doer tgeloue, Ioseph steruende, heeft gedachtich geweest vanden wtganck der kinderen van Israel, ende heeft beuolen van sinen gebeenten.

23

Doer tgeloue, als Moyses geboren was, is drie maenden verborgen van sinen ouderen, ouermidts dat si sagen een suuerlick

[p. N5v]

kinderen: ende en hebben nyet gheureest tghebot des conincs.

24

Doer tgeloue, Moses groot zijnde heeft geweygert geheeten te worden een soon des dochters van Pharao, ⁺

+ Exo. xij.d

25

verkiesende lieuer mettet volck gods gequelt te worden, dan te ghebruycken dye verganckelike soeticheyt des sondes,

26

achtende die schande Christi meerder rijcdom te wesen, dan die scatten der Egiptenaren, want hy aensach dat loon.

27

Doer tgeloue heeft hi gelaten Egipten, niet vreesende die wreetheyt des conincs, recht oft hi gesien hadde den ghenen die daer is onsienlick, also is hi verhart geweest.

28

⁺Doer tgheloue, heeft hi ghehouden den paesschen, ⁺ ende die wtstortinge des bloets: op dat de ghene die dode die eerste geboren: haer niet raken en soude.

+ F

+ Exo. xij.b

29

Doer tgheloue, zijn si ghegaen doer dat rode meer, ⁺ ghelijck als doer droghe aerde, welcke, als die van Egypten besochten, zijn verslonden.

+ exo. xiiij.g

30

Doer tgheloue zijn tsamen neder geuallen de mueren van Hierico, doen si tot seuen dagen toe omgecingelt waren.

31

Doer tgheloue en is niet vergaen Raab dye ghemeen vrou metten onghelouigen, doen si ontfanghen hadde die verspiers in haer herberghe.

32

Ende wat sal ick voort meer seggen: want die tijt soude my ontbreken, ⁺ vertellende van Gedeon, van Barach, van Samson, ende Iephthe, ende oeck mede van Dauid, ende ⁺ + Samuel, ende die propheten,

+ Iosue. ij.a.

+ G

33

welcke, doer dat gheloue verwonnen hebben conincrijcken, ende werckende rechtuerdicheyt, hebben vercreghen die beloftenissen. Sy hebben ghestopt dye monden der leeuwen,

34

si hebben wtgedaen dye cracht des vuers, si hebben veriaecht die scarpheden des swaerts si zijn starck gheworden wt der crancheyt, si zijn vroom gheworden inden strijt, si hebben van haer ghekeert dye aenuechtinghe der vreemder.

35

Die vrouwen hebben ontfanghen haer dooden, wter verrisenissen. Dye andere zijn wt gherect, versmaet hebbende die verlossinge om dat si een beter verrisenisse souden vercrighen.

36

+ Weder om, die ander zijn ondersocht geweest met bespottinge ende slaginge, ende daer en bouen met banden ende kercker,

37

si zijn ghesteenicht geweest, si zijn ontween geclooft gheweest si zijn ghetenteert gheweest, ende doer doot slaghinge des sweerts zijn si ghestoruen, si hebben omghegaen in schapen [kolom] ende gheyten vellen, verlaten zijnde, benaut zijnde, bedruct zijnde,

38

welcke dye werelt onwaerdich was, dwalende in die wildernissen ende berghen, ende holen, ende speloncken des aertrijcs.

39

Ende alle dese beproeft zijnde doer dat getuych des geloefs * en hadden dye beloftenissen niet ontfanghen,

40

om dat god wat beters van ons voorsien hadde, op dat si niet sonder ons voleynt en souden worden.