De Vorsterman Bijbel

§ Dat .ix. Capittel.

1

⁺HIer omme so hadde ooc dat eerste (testament) zijn vierlicheden, ende een wereltlike heylicheyt.

+ A

2

+ Want ten eersten is gemaect gheweest, dat Tabernakel, ⁺ inden welcken waren die candelaren, ende die tafel, ende die voorsettinghe der brooden dat gheheeten wert heylich.

+ Exo. xl.a.

3

Maer achter die gordijn was dat tweede Tabernakel, welck gheheeten wert, dat heylich der heylighen,

4

hebbende een gouden wieroock vadt, ende die Arcke des testaments, ouer al met goude ouertoghen. In welcke de gulden eemer was, hebbende dat hemels broodt, ende Aarons roede, welcke ghebloeyt hadde, ende die tafelen des testaments.

5

Maer bouen desen tabernakel waren figueren vanden Enghelen der glorien, genoemt Cherubin, om bedeckende den stoel der ghenaden, vanden welcken en is nv niet bisonderlinc te seggen.

6

⁺Maer dit aldus gestelt wesende, ⁺ ghingen dye priesteren altijt in deerste tabernakel, volbrenghende die diensten der offerhanden.

+ B

+ Leu. 86.a

7

Maer in dat tweede, ingaet eens alle iaers die bisschop alleen, niet sonder bloet twelcke hi offert voor hem seluen, ende voor die onwetentheden des volcs.

8

Dat beteekenende die heylige geest, als dat den wech des heylicheyts noch niet openbaer en was, bliuende noch staende die eerste Tabernakel

9

⁺Welcke is een gelijckenisse, na den tijt doen teghenwoordich. Inden welcken gheoffert worden gauen ende offerhanden, welcke nae-[kolom]der consciencien den dienaer niet perfect maken en mochten,

+ C

10

alleen ingesedt wesende in spisen in drancken, ende menigerley suuermakinge, ende rechtuaerdichmakinge des vleesches, totten tijt des beterincs.

11

⁺+ Christus tegenwoordich ouerste priester der toecomender goeden, ⁺ door een meerder ende volmaecter tabernakel, niet met handen gemaect, dat is niet dees timmerings,

+ D

+ ij.Pet. i.d. i.Ioan. i.c Apo. i.b

12

noch ooc door tbloet der bocken oft calueren, maer door zijn eygen bloet, is in ghegaen eens in die heylige, op dat hi soude vinden eewighe verlossinge. *

13

Want ist dattet bloet der stieren ende bocken, ende die assche der verren besprenckelende die beulecte, heylich maect, tot suuermakinge des vleeschs.

14

Hoe veel te meer dat bloet Christi, welcke hem seluen geoffert heeft door den heyligen geest, gode onbeulect, sal suueren onse conscientien vanden dooden wercken, om te dienen den leuendigen god?

15

Ende daer om is hi een middelaer des nieuwen testaments, op dat door middelinghe des doots, ⁺ tot verlossinge van die ouertredingen, welcke waren onder deerste testament, souden ontfangen die ghene, die gheroepen zijn, dye beloftenisse des eewighen erffenisses. *

+ E

16

Want so waer een testament is, ist van node datter tusschen gaet die doot des gheens dye dat testament maect.

17

Want een testament is vast inde doden, anders en ist noch van gheender waerde, ⁺ so lange als hi leeft, diet testament gemaket heeft.

+ Gala. 3.b.

18

Waer wt ooc dat eerste niet gheuesticht en is sonder bloet.

19

Want als Moyses gelesen hadde alle gebot nader wet, alle den volcke, genomen hebbende dat bloet der calueren ende bocken, met water ende purpuren wolle, ende ysope heeft hi tsamen besprenget dat boec ende alle tgeheel volck,

20

seggende.

Dit is tbloet des testaments, ⁺ twelck v god geboden heeft.

+ Exo. 24 b

21

Ende oock daer en bouen besprenckelde hi des gelijcs metten bloede, tabernakel, ende alle dye vaten des diensts.

22

Ende by na alle dinghen inder wet, worden metten bloede ghereynicht. Ende sonder wtstortinghe des bloets, en gheschiet gheen verghiffenisse.

23

⁺Daer om ist van noode, dat die exemplaren der hemelscher dingen, sullen met dusdanigen dingen ghesuuert worden. Maer die hemelsche dinghen moeten ghereynicht worden met beter offerhanden dan dese zijn.

+ F

24

Want Christus en is niet inghegaen in die heylighe met handen ghemaect, dat gheli-

[p. N4v]

kennissen zijn inder warachtiger, mer inden hemel selue, om dat hi nv openbaren soude voor Gods aenschijn, voor ons,

25

niet om dat hi dicwils hem seluen offeren soude, gelijc als die ouerste priester ingaet alle iaer in die heylighe door vreemt bloet.

26

Anders soudet van noode gheweest zijn, dat hi dicwils moeste gepassijt zijn van beghin des werelts. Mer nv voor dat eynde der werelden is hy eens gheopenbaert, om te dragen die sonde, door op offeringe zijns selfs.

27

⁺Ende ghelijck alle menschen ghesedt is eens te steruen, ⁺ ende daer na dat ordeel.

+ G

+ Rom. v.b. i.Pet. iij.d

28

Alsoo is oock Christus eens gheoffert, om dat hi af nemen soude dye sonden van veel weder om sal hi openbaren sonder sonde, allen den ghenen die hem verwachten tot salicheyt.