De Vorsterman Bijbel

§ Dat .viij. Capitttel.

1

⁺DIe somme van allen dien dingen, dye welcke wi seggen, is dese. Als dat wi hebben alsodanighen Bisschop, die gheseten is totter rechter hant des stoels, des moghentheyts,

+ A

2

een dienaer der heylighen, in die hemelen, ende des warachtighen tabernakels, twelck God gheuesticht heeft, ende gheen mensche.

3

Want alle Bisschop wort ghestelt om te offeren gauen ende offerhanden. Waer om ist van noot, als dat dese ooc wat hoort te hebben, welc hi offeren mach

4

Daer om, waer hi inder aerden, hi en soude gheen priester wesen. Want daer zijn priesteren welcke gauen offeren na der wet,

5

⁺dienende den exemplare ende schijnsele der hemelscher dinghen, gelijckerwijs Moysi geantwoort is, ⁺ doen hi soude volmaken dat tabernakel. Siet (sprack hi) dat ghi alle dingen doet, naden exemplare, twelck v getoont is inden berch.

+ B

+ Exo. xxv. Actu. vij.f

6

Maer nv, heeft hi verworuen eenen beteren dienst, ghelijckerwijs als hy geworden is een middelaer van beter testament, dat in beter beloftenissen geheylicht is.

7

Want waert dat het eerste alsodanich gheweest hadde, als datter nyet in hem en soude bestraft moghen worden, gheensins en soude anderwerf een plaets gesocht zijn geweest

8

Wandt beschuldighende haer, spreect hy. Siet, dye daghen sullen comen, seyt dye Heere, ende ick sal veruullen opt huys van Israel, ende opt huys van Iuda, een nyeuwe testament,

9

nyet na den testament, twelc ic

[p. N4r]

gemaect heb haren vaderen, in dien dage, doen ic aen vattede die hant van haer, ⁺ dat icse wt leyden soude wt Egypten, want si en bleuen niet in mijn testament, ende ic hebse oock vergheten, seyt die heer.

+ hie. xxxi a

10

Want dat ist testament, welck ic bestellen sal den huyse van Israel, na dien dage seyt die heer. ⁺ Ic sal geuen mijn wetten in hare verstanden, ende sal dye in scriuen in haer herten, ende ick sal haer een God zijn, ende si sullen mi een volck zijn. ⁺

+ D

+ hie. xxxi f

11

Ende nyemant en sal leeren sinen naesten, noch een yeghelic sinen broeder, segghende. Kent den Heere, ouermidts datse alle ghader my sullen wesen bekennende, vanden minsten totten meesten.

12

Wandt ick sal ghenadich wesen haren boosheden, ende haren sonden, en sal ick nyet meer ghedencken.

13

Segghende nyeuwe, heuet hy veroudt dat eerste, Maer dattet veroudt ende veriaert, is by dattet vergaen sal.