De Vorsterman Bijbel

§ Dat .vi. Capittel.

1

⁺DAer om, achterlatende twoort, welcke een beghinsel maect in Christo, laet ons voort varen totter volmaectheit. Niet weder om liggende tfundament des penitencijs, vanden doden wercken, ende des geloofs in gode,

+ A

2

ende der doopselen, ende der leeringen ende der handen oplegghinge, ende des verrisenis der doden, ende des eewigen ordeels

3

Ende dit sullen wi doen, in dien dattet god toe laet.

4

Want het is onmogelic, dat die ghene die eens verlicht geweest zijn, ende hebben gesmaect die hemelsche gaue, ende zijn deelachtich gheworden des heylighen gheests

5

ende hebben gesmaect niet te min dat goede woort gods, ende die crachten des toecomende werelts,

6

ist dat si ontuallen, ⁺ weder om souden mogen door penitencie vernieut worden cruycende weder om haer seluen den soon gods ende voor spot hebbende.

+ B

7

Want die aerde, welcke op dringt den reghen, die dicwils op haer coemt, ende bequaem cruyt voort brengt den ghenen, door wiens naersticheyt datse gebouwet wort, ontfanct die benedictie van God.

8

Maer dye welcke voort brenct doornen ende dijstelen, dye is verworpen, ende na by die maledictien, wiens wtganck hier toe strect, datse verbrant worden.

9

Wij betrouwen v alder liefste, die beter zijn, ende die die salicheyt naerder zijn, hoe wel dat wi so spreken.

10

Want god en is niet onrechtuaerdich, dat hi wil vergheten ws wercks, ende arbeit des liefts, welcke ghi bewesen hebt in sinen naem, ⁺ ghi die ghedient hebt sinen heylighen, ende noch dient.

+ C

11

Ende wij begheren, dat een yeghelic van v bewisen wil die selfde sorchfuldicheyt, tot een volbrenghinghe des hoops, tottet eynde toe.

12

Ende en wilt niet traech zijn, maer naeuolghers [kolom] der gheenre, dye door den ghelooue, ende verduldicheyt ontfanghen derffenisse des beloftenis.

13

God gheloouende Abraham, want hi nyemant groter en hadde: ⁺ bi welcken hi mocht zweeren, heeft by hem seluen gesworen,

+ D

14

segghende. Waerlick ghebenedijende sal ic v ghebenedijen, ende vermenichfuldighende sal ic v vermenichfuldigen.

15

Ende na dien hy alsoo lijdtsamelick verwacht had, heeft hi vercreghen die belofte.

16

Want die menschen sweeren by die meerder is, ende so is hem een eynde van alle twist, ist dat in een vastichheyt volcht den eedt.

17

In welcken als God woude thonen zeer hoochlic den erfgenamen des beloftenis, die vasticheyt zijns raedts, heeft daer eenen eedt tusschen gesedt.

18

Op dat door twee onuerganckelike dinghen, inden welcken niet geschien en mocht, als dat god lieghen soude, wi hebben souden een stercke vertroostinge. Wi die geuloden zijn, om te houden die hope die ons voorgesedt is, ⁺

+ psal. c.ix.

19

welcke wi houden als een vrij ende vast ancker des siels, ooc ingaende tot die dingen, die welcke binnen den bedecsel zijn,

20

daer Iesus de voorloper voor ons gegaen is nader ordinancie Melchisedech, gheworden een ouerste priester inder eewicheyt.