De Vorsterman Bijbel

§ Dat .ij. Capittel.

1

⁺MAer spreect ghi, dat den rechte leere toe behoort.

+ A

2

Den ouden dat si sober zijn, reyn, wijs, oprecht int geloof, inde liefde in verduldicheyt.

3

Des ghelijcs de oude vrouwen, dat si int habijt zijn, twelc haer heylicheyt betaemt, gheen beclapsters, noch veel wijns suipende, wel leerende,

4

dat si wijsheit leeren die ionghe vrouwen, dat sie haer mannen lief hebben, ende haer kinderen lief hebben,

5

dat si wijs zijn, sober zijn, reyn, bewaersters des huys, goet, haeren mannen onderdanich, op dattet woort Gods niet gheblasphemeert en wert.

6

⁺Des gelijcs vermaent, den iongelingen dat si sober zijn,

+ B

7

bouen al, v seluen geuende, tot een exemplaer van goede wercken, in leeringhe, volmaectheyt, in treffelicheyt,

8

trechte woort onstraffelick, op dat die ghene die daer tegen strijt, beschaemt worde, niet quaets hebbende, dat hi van ons seyt.

9

Den knechten vermaent, dat si haeren heeren onderdanich zijn, haer in allen behagen niet teghen sprekende, ⁺

+ Ephe. vi a Col. iij.d. i.Pet. ij.c.

10

niet ontstelen, maer alle goede betrou thoonende, op dat si die leeringhe Gods ons salichmakers vercieren in allen dinghen.

11

⁺+ Want die gracie Gods ende ons salichmakers heuet gheopenbaert allen menschen,

+ C

12

leerende ons, dat wi versakende alle boosheyt, ende wereltlike begheerlicheden, soberlick, ende rechtueerdelick, ende goddienstelic leuen souden in dese werelt,

13

verwachtende den heylighen hope, ende toecoemst des glorie vanden grooten God, ende salichmakers Iesu Christi,

14

⁺dye hem seluen voor ons gegeuen heeft, op dat hi ons verlossen soude, van alle onrechticheyt, ende reynigen hem seluen, een aenghenaem volc, een nauolgher van ghoede wercken.

+ D

15

Segt ende vermaent dit * ende straft met alle ghebodt, Nyemant en versmade v.